15. april er søknadsfristen for høgare utdanning – dette må du vite

OBS! Denne saka er frå 2023. I 2024 er søknadsfristen måndag 15. april.

Søknadsfristen er laurdag 15. april klokka 23.59

Laurdag 15. april klokka 23.59 er fristen for å søke høgare utdanning. Innan klokka slår 00.00 natt til sundag 16. april er det altså for seint å leggje inn fleire studieretningar du vil søke på. Dette gjeld både universitet, høgskular og fagskular.

Laurdag er også fristen for å laste opp dokumentasjon på avslutta utdanning. Dersom denne informasjonen allereie ligg inne eller du avsluttar utdanninga etter søknadsfristen, gjeld ikkje dette deg.

Tips! Ikkje la treigt internett gjere at du går glipp av fristen ved å logge inn laurdag klokka 23.55. Du kan logge inn på Samordna opptak no og legge inn det du skal.

Når må eg ha prioritert rekkjefølgje?

Når du har lagt inn alle vala dine (maks ti stykk), kan du sortere dei i ei prioritert rekkjefølgje. Du er garantert den fyrste studieplassen som du kjem inn på, men dei andre fell då bort. Difor er det viktig å tenke gjennom kva du plasserer på toppen.

Dersom du søkjer på ein fagskule må du prioritere rekkjefølgja innan laurdag 15. april klokka 23.59, altså det same som søknadsfristen.

Dersom du søkjer deg til universitet eller høgskule, er fristen 1. juli klokka 23.59. Dette er også fristen for å laste opp dokumentasjon på fullført utdanning frå i vår.

Når får eg svar?

Dersom du har søkt til ein fagskule får du svar på søknaden allereie 25. mai. For universitet og høgskule får du svar 20. juli.

Når må eg svare?

For å sikre deg plassen du har fått tilbod om må du takke ja seinast 1. juni for fagskular og 24. juli for universitet og høgskular.

Når kan eg søke på restplassar?

Du kom ikkje inn på det du kunne tenke deg, men det er framleis mange moglegheiter! Fleire studieretningar får ikkje fylt opp studia sine, og du kan søke på desse ledige plassane.

For fagskular får du oversikt over desse plassane frå 30. mai og du kan søke på dei frå 31. mai.

For universitet og høgskular får du oversikt over desse plassane frå 19. juli, og du kan søke på dei frå 20. juli.

Merk! Desse plassane har løpande opptak. Det vil seie at den fyrste som søker får plass. Difor er det lurt å vere så tidleg ute som mogleg dersom du vil søke på desse plassane.

Er det noko poeng å søke om eg ikkje kan starte rett på studiet?

Ja, absolutt! Dersom det er noko som hindrar deg frå å starte på ei studieretning i løpet av dei neste to åra, kan du søke om reservert studieplass.

Dette må du gjere direkte til den staden du har fått studieplass, ikkje gjennom Samordna opptak. Førstegongsteneste er ein vanleg grunn, men det er også mogleg å få det på grunn av til dømes helsesituasjonen din. Det er utdanningsinstitusjonen som godkjenner eller avviser søknaden din.

For å søke om reservert studieplass må du takke ja til plassen, før du sender ein søknad seinast tre veker etter du fekk tilbodet.

Korleis skal eg faktisk velje?

Det er ikkje enkelt å svare på, men vi har nokre saker som er fine å lese gjennom dersom du framleis er usikker:

• Sjekk sakene våre under Yrket Mitt for å få ein smakebit av kva du kan vente deg i forskjellige karrierar. Der kan du lese om yrke som revisor, krimteknikar, sexolog, røyrleggar og mykje anna!
• «23-åringar har ikkje svar på alt» skriv Emilie Hansen i dette meiningsinnlegget frå i fjor. Berre fordi du får deg ein bachelor i noko, tyder ikkje det at du veit kva du driv med. Du har med andre ord tid til å finne ut av ting.
• Nokre studium er vanskelegare å kome inn på enn andre. Ha difor det i tankane dersom du skal søke på det som var dei mest populære studia i fjor.
• Kva er poenget med utdanning? I dette meiningsinnlegget skriv Neha Ikram at poenget er å forstå livets store vidder.

• Les også: Kva er greia med lånekassa?