Rekordmange sjukepleiarstudentar og medisin på topp – sjå opptakslista
Medisin ved Universitetet i Oslo er det vanskelegaste å kome inn på, med ei poenggrense på 69,6 poeng. Fleire har også fått plass på sjukepleiar- og lærarstudia samanlikna med i fjor.
9634 personar har fått plass på sjukepleiarstudiet til hausten, meir enn nokon gong før. Også talet på lærarstudentar har fått eit oppsving.
– Vi har stort behov for sjukepleiarar i heile Noreg. At rekordmange får tilbod om studieplass på sjukepleie, er veldig gode nyheiter, seier forskings- og høgare utdanningsminister Sigrun Aasland (Ap) i ei pressemelding.
Talet på søkarar til sjukepleiarutdanninga auka med 40 prosent frå i fjor.
– Vi har oppfordra studiestadane til å vurdere å ta opp ekstra mange i år. Eg er veldig glad for at dei har følgt opp, seier Aasland.
Ho fortel at auken på sjukepleiarstudiet er størst blant eldre søkarar på nye deltidsutdanningar, men at det også er fleire unge som har søkt og fått tilbod om studieplass.
Rekordopptak
Årets opptakstal viser at totalt 112.809 søkarar har fått tilbod om studieplass, 3 prosent fleire enn i fjor.
Studiane det var vanskelegast å komme inn på i den ordinære kvoten, er medisinstudia ved Universitetet i Oslo og ved NTNU i Trondheim. På tredjeplass ligg industriell økonomi og teknologileiing ved NTNU.
Sjå dei ti studia med høgast poenggrense nedst i saka.
64 prosent av søkarane fekk plass på førstevalet sitt.
– Aldri før har det vore fleire studieplassar tilgjengeleg og aldri før har fleire fått plass på førstevalet sitt, opplyser departementet.
Oppsving for lærarutdanninga
Tala viser også at talet på studentar på grunnskulelærarutdanninga har auka. 3982 søkarar har fått tilbod om studieplass, 1630 fleire enn i fjor.
Departementet opplyser at dette er det høgaste talet som har fått tilbod om studieplass på lærarutdanninga sidan 2020.
– Vi har jobba målretta for å styrke rekrutteringa til lærarutdanningane. Vi treng gode lærarar for å bygge eit godt samfunn, og det har vore viktig å snu den negative trenden frå dei siste åra, seier Aasland.
Færre barnehagelærarstudentar
Blant utdanningsområda som har nedgang i år, er IKT og barnehagelærar.
16 prosent færre søkarar hadde barnehagelærar som førsteval i år, og talet som har fått tilbod om studieplass, har falle med 26 prosent.
– Her har vi framleis ein jobb å gjere framover, seier Aasland.
Innan IKT har talet på søkarar gått ned med 22 prosent.
– Samtidig som det er nedgang i reine IKT-studiar, ser vi at stadig fleire studiar har eit sterkt digitalt innslag, kommenterer forskings- og høgare utdanningsministeren.
Topp ti studium etter poenggrense (ordinær kvote)
- Medisin, Universitetet i Oslo, haust, 69,6 poeng
- Medisin, NTNU, 68,5 poeng
- Industriell økonomi og teknologileiing, NTNU, 68,4 poeng
- Medisin, Universitetet i Oslo, Oslo/Kristiansand, haust, 68,3 poeng
- Medisin, Universitetet i Oslo, vår, 68,1 poeng
- Psykologi, Universitetet i Oslo, haust, 68,1 poeng
- Medisin, Universitetet i Oslo, Oslo/Innlandet, 68 poeng
- Medisin, Universitetet i Oslo, Oslo/Kristiansand, vår, 67,8 poeng
- Medisin, Universitetet i Bergen, 67,2 poeng
- Medisin, NTNU, Trondheim/Levanger, 67 poeng
Kjelde: Samordna opptak
Topp ti studium etter poenggrense (førstegongsvitnemål)
- Industriell økonomi og teknologileiing, NTNU, 61,5 poeng
- Medisin, NTNU, 61 poeng
- Medisin, Universitetet i Oslo, haust, 60,5 poeng
- Honoursprogram, Realfag, Universitetet i Oslo, 60,1 poeng
- Business, economics and data science – siviløkonom, Norges Handelshøyskole, 59,2
- Medisin, NTNU, Trondheim/Levanger, 58,6 poeng
- Kybernetikk og robotikk, NTNU, 58,6 poeng
- Medisin, Universitetet i Oslo, Oslo/Kristiansand, haust, 58,6 poeng
- Medisin, Universitetet i Bergen, 58,5 poeng
- Medisin, NTNU, Trondheim/Ålesund, 58,2
- Kjelde: Samordna opptak
