Desse er nominerte til Gullbarbie 2025

«Dagbladet er ei stor, nasjonal avis som har lang fartstid, og har både fysisk og digital avis. Avisa tek for seg alt frå dagsaktuelle nasjonale og internasjonale saker, til saker om livsstil og mote. 

Dagbladet har tidlegare vunne Gullbarbie i 2016 med grunngjevinga «Dagbladet har framsider som ofte blir prega av einsidige ideal, seksualisering, gamle kjønnsroller, kvinner som illustrasjon for irrelevante saker og eit stort fokus på vekt og slanking».

I år nominerer vi Dagbladet igjen, fordi trass i at dei har vunne Gullbarbie før, ser vi at dei har same skadelege haldningar, saker og reklamar i avisa si den dag i dag. Barn og unge er tydelege i si tale om at nasjonale aviser ikkje treng å seksualisere sitt innlegg for å spreie nyheiter.»

«Gutta Sprut er eit aksjeselskap eigd av fleire kjente norske influensarar, blant andre Oskar Westerlin og Baris Brevik. Selskapet har som formål å produsere medieinnhald for den norske marknaden, og har blant anna ein YouTube-kanal der dei gjer akkurat dette. 

Kvifor er Gutta Sprut AS nominert til Gullbarbie? 

Gutta har gjentatte gongar fått kritikk for innhaldet på deira sosiale medium. Dei har blant anna blitt skulda for homohat og ytringar som er negative mot skeive, nedverdigande ytringar om kvinner og ein overdriven bruk av pengar og alkohol offentleg på sosiale medium. Gutta har produsert videoar med titlar som «gjett homsen» og «10 damer vs. Oskar Westerlin». Gullbarbie i år set fokus på retten til ein trygg oppvekst på nett og Gutta si verksemd bidrar til framandgjering og kroppspress blant anna gjennom homofobiske haldningar og fokus på einsidige skjønnheitsideal.

Trass i gjentatte skuldingar, kronikkar som diskuterer problematiske utsegn frå kanalen deira og ei rekke andre influensarar som henger selskapet ut for innhaldet deira – let det ikkje til å bli noka endring. Gutta Sprut AS blir difor nominert til Gullbarbie på bakgrunn av selskapets negative og utdaterte haldningar, som bidrar til ein kultur blant unge, spesielt gutar, som er skadeleg for deira utvikling som barn.»

«TikTok er blant plattformene som blir nytta mest av barn og unge, og er også ein representant for eit større problem i denne settingen. Meta, Snapchat og TikTok er plattformer som spelar inn i eit større problem med algoritmar og marknadsføringspraksisar som påverkar barn og unge negativt. Det gjer at samfunnsansvaret til plattformer som TikTok er stort, og ifølgje barn og unge er det tydeleg at dei ikkje tek det ansvaret på alvor. Skuldingane mot TikTok om sal av personopplysningar og bruk av åtferdsbasert reklame er mange, og ikkje minst er det kritikkverdig kva innhald dei tillèt på plattforma. 

I tillegg til sine avhengigheitsskapande system og algoritmar har influensarar av alle slag etablert seg godt på plattforma. Influensarmarknadsføringa si påverknadskraft på barn og unge er ulik noko anna. Barn og unge opplever ein nærleik til influensarar og skaper para-sosiale forhold som gjer at ein reklame kan følast som ein ven som anbefaler deg eit produkt – og ikkje frå selskap som tener millionar på slik marknadsføring. Dette gjer TikTok som kandidat svært relevant med tanke på at dei andre kandidatane begge nyttar TikTok for si verksemd.

TikTok er nominert for sine avhengigheitsskapande algoritmar og for å sette lys på korleis influensarmarknadsføring påverkar barn og unge.»