Forbrukarrådet etterlyser ny husleigelov
Husleigelova vernar for dårleg om leigetakarane, og arbeidet med å sikre betre vern går altfor sakte, meiner Forbrukarrådet, som ber politikarane få opp farten.
Denne artikkelen er eldre enn 1 år gamal. Det betyr at noko av informasjonen kan vere utdatert.
– Vi ønskjer ein totalgjennomgang av husleigelova. Det vil seie at det blir sett ned eit lovutval med alle partar involverte, så får vi ein grundig gjennomgang, seier fagdirektør i Forbrukarrådet, Olav Kasland, til Klassekampen.
- Visste du at snittleigeprisen for ei toroms leilegheit i Noreg er 9.530 kroner? Sjå meir statistikk om bustadmarknaden i Noreg her.
20 prosent er leigetakarar
Forbrukarrådet gjekk i mars i fjor ut og sa det hasta med å få på plass ei ny lov slik at rettane til leigetakarane blir betre varetekne. Ifølgje dei er omtrent 20 prosent, rundt éin million av nordmenn leigetakarar.
– Hastar
Kasland ber Stortinget ta initiativ til arbeidet Forbrukarrådet meiner trengst.
– Dette hastar. Dette var noko dei fleste partia lova før valet. No må dei følgje opp, seier han.
Vurderer om rettane bør styrkjast
Statssekretær Nancy Porsanger Anti (Sp). Foto: Trond A. Isaksen/regjeringen.no
Regjeringa har varsla ei bustadmelding, men ifølgje Kasland står det ingenting om leige i dei prioriterte punkta.
Statssekretær Nancy Porsanger Anti (Sp) seier likevel at leigemarknaden blir ein viktig del av bustadmeldinga.
– Departementet jobbar no med å kartleggje behovet for ei eventuell revurdering av husleigelova. I dette arbeidet blir det også vurdert om rettane til leigetakarane bør styrkjast.
Som leigetakar er det viktig å kjenne rettane sine. Det kan potensielt spare deg for både pengar og bry. Foto: Bench Accounting/Unsplash
