Johannes (19) vil bli sjukepleiar, men først må han ta opp fag

– Eg veit allereie at snittet mitt ikkje er høgt nok, så eg går inn for å forbetre det, seier Johannes Trommestad på telefon til Framtida.no.

19-åringen har det siste året gått på linja Adventure Action Sport på Solborg folkehøgskule i Stavanger, og har brukt året på å kome fram til kva utdanning han skal søkja.

– Det er så uendeleg mange val å kunne velje mellom. Det er mest i løpet av dette skuleåret eg har funne ut kva eg vil, forklarar Trommestad.

Arendølen drøymer om ei framtid som sjukepleiar og har sett seg ut Høgskulen på Vestlandet. I fjor var poenggrensa for å kome inn på sjukepleien ved HVL i Bergen på heile 53,4 for ordinært opptak. Det betyr at ein må ha eit karaktersnitt på 5,4 eller eit lågare snitt med diverse tilleggspoeng.

• Les også: Rekordmange strauk på sjukepleiareksamen

Omsorgskvardag

Sjukepleiarar er eit av yrka me kjem til å trenge fleire av i framtida. Ledigheita i yrket er låg og ifølgje SSB vil me mangla 28.000 sjukepleiarar i 2035.

Trommestad kan difor sjå fram til ein sikker arbeidskvardag etter enda utdanning.

19-åringen er svært nøgd med valet om å gå på folkehøgskule under koronaåret og håpar å få utvida opphaldet med ei stipendiatstilling, som han vil kombinera med å ta opp fag.

Trommestad har høyrt om fleire som vil søkja sjukepleien, men det er ikkje dei trygge jobbutsiktene som har fått 19-åringen til å velja sjukepleie.

– Eg har alltid vore eit veldig omsorgsmenneske. Eg føler at det er noko eg kan jobbe med resten av livet: Å hjelpe andre, seier Trommestad.

• Les også meiningsinnlegget: «Eit lite hjartesukk og ei bøn frå ein sjukepleiar»

Illustrasjonsfoto: Zhen Hu/Unsplash/Privat.

Fleire sjukepleiarutdanningar på topplistene

Han er langt frå åleine. Talet på søkjarar til sjukepleieutdanninga auka i 2020 med nesten seks prosent frå 2019. Det kom etter at utdanninga fekk ein nedgang i 2019, noko som vert sett i samanheng med det nye karakterkravet. Frå og med 2019 må nemleg søkjarar til sjukepleien ha karakteren 3 eller betre i matematikk og norsk.

Men i koronaåret 2020 gjekk sjukepleien fram og kom på tredjeplass over dei mest populære utdanningsområda med heile 13 563 søkjarar til 5150 studieplassar.

For å kome inn på sjukepleien i Tromsø, som hadde det høgaste snittet, måtte søkjarar i fjor ha heile 56,6 poeng, ifølgje fagbladet Sykepleien.

Både NTNU, Oslomet og Høgskulen på Vestlandet sine sjukepleiarutdanningar kom på topp ti-lista over studia med flest søkjarar som hadde utdanninga som førsteval, viser tal frå Samordna opptak.

• Les om kvardagen som sjukepleiar: – Sjølv om ein til tider føler ein står og stanger hovudet i veggen, trur eg at eg har den mest meiningsfulle jobben, fortel Ragnhild. 

Nestleiar i Norsk Sykepleierforbund Student, Kent Hanssen, meiner årsakane til den aukte interessa for sjukepleie er samansett. Foto: Privat

NSF Student: – Sjukepleie er eit sikkert yrke

– Eg vil tora å påstå at ingen andre yrke er blitt så synlege som det sjukepleie har, og dette trur eg vil speglast i søkjartala.

Nestleiar i Norsk Sykepleierforbund Student Kent Hanssen gjev koronapandemien hovudæra for den auka synlegheita til yrket, men tenkjer at dei gode søkjartala og høge poenggrensene for å kome inn seier noko om at statusen og etterspurnaden til utdanninga har auka.

– Sjukepleie er eit sikkert yrke, kor ein er garantert jobb. For mange er nok denne tryggheita det dei er ute etter, skriv Hanssen i ein e-post til Framtida.no.

Han gler seg òg over at stadig fleire menn veljer sjukepleie, noko NSF Student har jobba med gjennom kampanjen «Mann Kan Bli Sykepleier».

• Les også: Fagopplæringssjefen er provosert på vegner av kvinner i lågtlønsyrke: – Jenter veit ikkje kva dei går glipp av

Løn og kjønnsbalanse

Kvinnedelen i sjukepleiaryrket er høg, noko som ikkje ser ut til å endre seg betydeleg med det første. Dei to føregåande åra har nemleg kvinnedelen på studiet vore på 84 prosent.

Ved sjukepleieutdannngane ved Universitetet i Agder og Lovisenberg diakonale høgskole får menn i tillegg to kjønnspoeng for å bøta på ubalansen.

At han går inn i eit kvinnedominert yrke har ikkje Trommestad tenkt nemneverdig over. Han får heller ikkje mange reaksjonar, og dei som kjem er positive.

– Har løn hatt noko å seia for yrkesvalet?

– Før var det kanskje litt sånn, men no tenkjer eg berre at det er ein ting eg kan like å jobbe med. det handlar meir om å kunne vere lykkeleg med den jobben eg har, eller kjem til å få.

• Les også: «Helsebrødre som ikke er brødre»: – Kall meg kva du vil

Helsesjukepleiarstudentane Ørjan Bergfalk og Carlos Landberg har berre positive erfaringar med å vere menn i helsevesenet. – Pasientar antar gjerne at du er veldig flink, utan at du har fortent det – altså heilt i starten.