Vekas viktigaste: Forsvarsavtale, statsbudsjettsemje og flaum i Asia

Historisk avtale mellom Noreg og Storbritannia

Torsdag inngjekk Noreg og Storbritannia sin mest omfattande forsvarsavtale i nyare tid, skriv NRK.

I ei pressemelding skriv Forsvarsdepartementet at britiske styrkar skal få ei større rolle i forsvaret av Noreg, med mellom anna maritimt samarbeid og droneprosjekt i nordområda. Dei skal òg ha materiell lagra i Noreg, så dei raskt kan kome til unnsetning om det trengst.

Statsminister Jonas Gahr Støre (Ap) seier til NRK at avtala er historisk, og at ho vil gi auka sikkerheit for Noreg, Storbritannia og våre allierte i ei uroleg tid.

USA stansar innvandring frå 19 land

Alle søknadar om innvandring til USA, mellom anna permanent opphald og statsborgarskap, er no sett på pause for folk frå 19 land, skriv Nettavisen.

Dei 19 landa fekk innreiseavgrensingar tidlegare i år. Avgjerda om full stans kjem etter at ein afghansk immigrant blei pågripen for å skyte to soldatar frå nasjonalgarden.

Trump skreiv på Truth Social førre veke at han vil jobbe for ein innvandringspause for «alle land i den tredje verda».

Tidlegare denne veka sa han også at USA går feil veg om dei held fram med å ta inn «søppel».

Store øydeleggingar og mange døde etter flaumar i Asia

Minst 1200 menneske skal vere døde etter store flaumar og jordskred over heile Asia, og ein million menneske er no på flukt.

Flaumane og skreda kjem av mange stormar og syklonar i ein uvanleg hard monsunsesong.

Ein rapport frå IPCC, eit internasjonalt klimapanel, slår fast at Sør- og Søraust-Asia vil få meir intense regnsesongar, og ein stor auke i antal flaumar i utsette regionar.

Ekspertar seier det kjem av eit varmare hav og ein varmare atmosfære.

Lyspunkt: Dei mest alvorlege HPV-typane er nesten utrydda blant unge vaksinerte

HPV-variantane som har forårsaka omtrent 75 prosent av livmorhalskreften i Noreg er nesten heilt borte, skriv Folkehelseinstituttet (FHI). Det gjeld for dei kvinnene som blei vaksinert i 7. klasse, og som har møtt til screening.

99 prosent av alle tilfelle av livmorhalskreft skuldast HPV. Blant dei fyrste kulla som fekk HPV-vaksine, har no berre 0,0-0,1 prosent viruset.

Ameli Tropé, leiar for Livmorhalsprogrammet ved FHI, seier resultatet nesten er betre enn dei håpa på.

Ho seier det er unikt å ha høve til å førebyggje ei kreftform så effektivt.