Studentar får 40 millionar kroner til lågterskeltilbod
Studentsamskipnadene får 40 millionar kroner til lågterskeltilbod, mellom anna til faddervekene.
Denne artikkelen er eldre enn 1 år gamal. Det betyr at noko av informasjonen kan vere utdatert.
– Dette er pengar som skal komme studentane til gode. Ein god studiestart er utruleg viktig for å få nye venner og eit sosialt nettverk tidleg. Det å trivast i ein ny by og på ei ny utdanning er òg viktig for å meistre det faglege.
Det seier forskings- og høgare utdanningsminister Henrik Asheim (H) i ei pressemelding, og held fram:
– Alt tilseier at vi får ein lagt meir normal haust i år. Det er gode nyheiter for studentane.
Felles fadderveke
Gjennom pandemien har studentane vore hardt ramma, særleg dei som starta å studere for første gong i fjor haust. Asheim foreslår derfor at faddervekene i haust òg skal inkludere fjorårets førsteårsstudentar.
– Det er viktig at dei som kanskje ikkje har fått moglegheit til å få seg venner og bli ein del av det sosiale fellesskapet, får ein ny sjanse. Derfor meiner eg det bør leggjast til rette for at også andreårsstudentene blir inkluderte i fadderveka til hausten og kan få ein ny start til hausten. Det kan disse pengane bidra til, seier statsråden.
Pengane som blir løyvde skal brukast i haust, men det er opp til studentsamskipnadene å bestemme kva dei skal brukast til.
- Les også intervjut med Caroline (19) om korleis det var å starte på universitetet i koronaåret: – Eg veit knapt kven eg går på kull med.
Caroline Clausen. Foto: Privat
