Vekas viktigaste: Epstein-dokument, israelsk droneåtak og tørke i Iran

Ekstrem tørke i Iran – tyr til vêrmanipulasjon

Det har vore ekstrem tørke i Iran denne hausten. Irans nasjonale meteorologorganisasjon anslår at mengda regn over heile landet har gått ned med 89 prosent samanlikna med gjennomsnittet, skriv CNN.

Det gjer dette til den tørraste hausten Iran har hatt på 50 år. Det er òg femte året på rad med tørke. Alt dette gjer at vassreservoara krympar, og folk må derfor konservere det vatnet som er igjen.

No har Iran begynt med skysåing, som inneber å tilføre kjemikaliar til skyer for å få dei til å produsere regn.

Førre veke annonserte president Masoud Pezeshkian at om det ikkje snart kjem meir regn, kan det bety at hovudstaden Teheran må evakuerast.

13 personar drepne i åtak på flyktningleir i Libanon

Israel gjennomførte eit droneåtak mot flyktningleiren Ein el-Hilweh i Sør-Libanon på tysdag, skriv VG. Ifølgje det libanesiske helsedepartementet er 13 personar drepne og fleire er såra.

Det israelske militæret (IDF) har stadfesta åtaket til The Times of Israel og hevdar at målet var aktørar frå Hamas som trente opp folk som skulle utøve terror mot Israel og IDF.

Det bur 70 000 flyktningar i Ein el-Hilweh, som er den største palestinske flyktningleiren i Libanon.

Tidlegare statsminister i Bangladesh dømt til døden

Sheikh Hasina (78), som var statsminister i Bangladesh frå 2010 til 2024, er dømt til døden for brotsverk mot menneskeslekta, ifølgje BBC. Hasina har levd i eksil i India sidan juli 2024, då ho vart avsett etter eit stort studentopprør i heimlandet.

Ho er blant anna dømt for å stå bak politivalden som drepte hundrevis av demonstrantar i opprøret mot ho. Hasina nektar for skuldingane, og seier rettssaka er politisk motivert.

India har førebels ikkje svart på førespurnaden frå Bangladesh om å få den tidlegare statsministeren utlevert. Bangladesh skal gjennomføre val til nasjonalforsamlinga i februar 2026.

Lyspunkt: Herrelandslaget til VM for første gong på 28 år

Det norske herrelandslaget i fotball vann overlegent mot Italia sist sundag. Med det tok dei åtte av åtte moglege sigrar i sin pulje, og er no garantert plass i fotball-VM.

VM i 2026 er sett til Nord-Amerika, og blir Noregs fyrste herre-VM sidan 1998.

5. desember blir det klart kven Noreg skal møte i VM. Det blir òg klart kva land og byar dei norske kampane skal spelast i.