Vekas viktigaste: Sanksjonar, smykketjuveri og forhandling om statsbudsjettet

USA med sanksjonar mot russiske selskap

Dei russiske oljeselskapa Rosneft og Lukoil får sanksjonar mot seg frå USA, ifølgje ei pressemelding frå det amerikanske finansdepartementet.

Sanksjonane gjeld også dotterselskapa til verksemdene. Dette blir gjort for å presse Russland til å avslutte krigen i Ukraina.

Departementet varsla også at finansinstitusjonar som tilbyr tenester for militærindustrien i Russland, eller gjennomfører store transaksjonar for dei, også kan få sanksjonar mot seg.

EU har også blitt einige om nye sanksjonar mot Russland, denne gongen mot flytande naturgass. Desse sanksjonane vil gjelde frå januar 2027.

Senterpartiet til forhandlingsbordet med regjeringa

Partileiar Trygve Slagsvold Vedum (Sp) seier han er villig til å forhandle om statsbudsjettet. Den siste veka har Arbeidarpartiet blitt kritisert og skulda for løftebrot, etter dei la fram forslaget sitt.

For Senterpartiet er det spesielt ordninga for å slette studiegjeld for dei som bur og arbeider i distriktet og gratis ferjer som har vore viktig.

Desse ordningane var føreslått nedskalert og kutta, men Arbeidarpartiet har snudd, noko som gjer Senterpartiet villige til å kome til forhandlingsbordet.

Smykketjuveri frå Louvre

Sundag 19. oktober stadfesta det franske kulturdepartementet at åtte smykkegjenstandar av «uvurderleg verdi» er borte. Ei krone dekt av diamantar har kome til rette, skriv NRK.

Tjuvane brukte ei kran til å kome seg til eit vindauge, som dei så skar opp med elektrisk sag. Ranet tok berre sju minutt. Førebels er ranarane på frifot.

Presidenten i Frankrike, Emmanuel Macron, har kalla innbrotet eit angrep på Frankrikes kulturarv. Han seier dei som har tatt smykka skal stillast for retten.

Opnar for å gå gjennom dei etiske reglane for oljefondet

Finansminister Jens Stoltenberg (Ap) har greidd ut for Stortinget om situasjonen til Statens pensjonsfond utland, også kjent som oljefondet. Han vil ha ein gjennomgang av dei etiske retningslinjene til fondet, ifølgje Dagbladet.

Stoltenberg vektlegg at det er viktig at fondet ikkje blir oppfatta som ein politisk aktør som skal fremje Noregs interesser.

Han seier også at det har vorte vanskelegare å vurdere kva selskap som fell innanfor og utanfor retningslinjene til oljefondet sitt etikkråd, og trekker fram store teknologiselskap som Amazon og Microsoft som døme.

Frp, Høgre, Sp og KrF støttar at fondet må halde fram å vere upolitisk, medan SV er kritisk til investeringar i Israel, og Raudt vil leggje Etikkrådet under Stortinget.