Vekas viktigaste: Naturkatastrofar, Etikkrådet og potensiell våpenkvile

RSF-militsen vil godta våpenkvileforslag i Sudan

Den paramilitære gruppa Rapid Support Forces (RFS) i Sudan har sagt dei vil godta USA sitt forslag til våpenkvile, ifølgje Reuters. Regjeringa har førebels ikkje sagt ja til forslaget.

Samstundes har FN sitt menneskerettsråd sagt at dei skal ha eit ekstraordinært møte på grunn av skuldingar om massemord i byen al-Fashir. RFS har klart å ta over byen, som var ein av dei viktigaste stadene styresmaktene kontrollerte.

Fredag morgon vart det rapportert om eksplosjonar nær hovudstaden Karthoum.

Sidan 2023 har det vore borgarkrig i Sudan mellom den paramilitære gruppa og regjeringshæren. Begge gruppene er skulda for menneskerettsbrot, og fleire millionar menneske er drivne på flukt. FN sa i juni at det var ein høg risiko for folkemord.

Minst 188 døde på Filippinane etter tyfon

Tyfonen Kalmaegi har bevegd seg gjennom Filippinane, og vidare mot det sørlege Kina og den vietnamesiske kysten denne veka. Ifølgje BBC har uvêret drepe minst 188 personar på Filippinane og fem i Vietnam. I tillegg er 135 sakna.

Ein ny og potensielt større tyfon er også på veg mot Filippinane, og er venta å treffe øya Luzon på måndag.

Forskarar åtvarar om at slike stormar blir større og kraftigare på grunn av klimaendringar. Førre veke kravde Melissa, den største registrerte orkanen nokon gong, 28 menneskeliv på Jamaica.

USA bombar båtar i Karibia

Tre personar døydde då amerikanske dronar bomba ein båt i Karibia førre helg. Dette er det siste av fleire droneåtak frå Trump-administrasjonen mot båtar i Karibia.

Ifølgje amerikanske styresmakter blir båtane brukt for å smugle narkotika til USA. Forsvarsminister Pete Hegseth har sagt at båten vart brukt av ei terroristgruppe, men har ikkje spesifisert kva gruppe det er snakk om.

Ifølgje BBC har 64 personar døydd i Karibia og det austlege Stillehavet sidan åtaka frå USA starta i september.

Både den colombianske presidenten Gustavo Petro og den venezuelanske presidenten Nicolás Maduro har fordømt åtaka.

Lyspunkt: Nordmenn les fleire bøker no enn på 90-talet

Ifølgje SSB les vi fleire bøker enn før. Dei har undersøkt lesevanane til nordmenn mellom 1994 og 2024. Dei yngste og eldste gruppene er dei som les mest.

Vi les også fleire papirbøker no enn på 90-talet. I fjor las 24 prosent av nordmenn i ei papirbok dagleg.

Kvinner les i snitt meir enn menn. Sidan 2020 har vi også høyrd meir på lydbøker, der dagleg lytting har hoppa frå 4 prosent til 8 prosent.