Då eg var 20: Arild Hermstad jobba i bank og kjøpte hus med systera
MDG-leiaren studerte for å bli siviløkonom, men hoppa av studia etter ei reise til Sør-Amerika.
– Eg jobba i bank, hadde masse vener, gjekk på byen, og spelte fotball på eit ganske dårleg fotballag.
Slik minnest Arild Hermstad (58) kvardagen som 20-åring. Då partileiaren til Miljøpartiet Dei Grøne var 20 år, hadde han vore i militæret i Nord-Noreg, før han returnerte til heimbyen Bergen. Der hadde han kjøpt seg ein tomannsbustad saman med systera si.
Det sterkaste minnet hans frå den tida, er nettopp å flytte inn i huset i romjula 1986.
– Eg hugsar at eg hadde ein Citroën 2CV, og at eg hadde kjøpt dette huset som eg skulle overta i desember. Eg jobba i bank, og difor fekk eg låne mykje meir enn det eg normalt sett burde fått lov til.
Hoppa av studia
Hermstad har vore leiar av MDG sidan 2022. Før det var han mellom anna leiar av Framtiden i våre hender i 15 år.
Men som 20-åring var miljøprofilen på eit litt anna spor.
– Planen var å jobbe litt i bank, og så ta siviløkonomstudiet på Handelshøgskolen. Eg starta der då eg var 22, men eg hoppa av etter eit besøk i Sør-Amerika, der eg såg kor urettvis verda er. Det gav ikkje lenger meining å berre jobbe for pengar. Sidan den gong har eg jobba for ei meir rettferdig verd.
Då Hermstad var 20 år, var det viktig for han å ha ein å dele livet med, å ha økonomisk tryggleik og ha gode vener å feste og vere med.
– Kven var den viktigaste personen i livet ditt?
– Utan at eg tenkte på det i det heile tatt, var det nok mor mi, som alltid har vore ei klippe i livet mitt. Ho blei aleinemor etter at far min døydde då eg var to år. Oppveksten gjorde at eg blei opptatt av å sikre meg sjølv ved å tene pengar.
Bjørneboe og rock
Om bergensaren hadde møtt seg sjølv om 20-åring, hadde han tenkt «Så fint eg hadde det, levde livet og hadde masse gode vener og gjorde mykje gøy.»
Han minnest at han las Jens Bjørneboe og var interessert i filosofi. MDG-aren høyrde stort sett på rock, men det gjekk i litt mindre heavy metal enn då han var yngre.
– Kva råd ville du gitt til deg sjølv?
– Hald fram med å kose deg i livet.
Vil du lese om fleire partileiarar og profilar?
Kva med nokre andre parti? Sjekk ut desse sakene
- Jonas Gahr Støre var befal i Marinen – og digga Hair-filmen
- Olaug Bollestad trekte lodd om kva ho skulle verte
- Guri Melby var hekta på «Big Brother» og opplevde verda bli forandra
- Erna Solberg studerte sosiologi og ville redde verda
- Sylvi Listhaug høyrde på techno og følte verda låg for hennar føter
