Universitet og høgskular bryt mållova

Blant verstingane er det største universitetet her i landet, NTNU, pluss Universitetet i Tromsø, OsloMet og Noregs miljø- og biovitskaplege universitet (NMBU).

Ved NMBU er under fire prosent av innhaldet på nettsider, sosiale medium og digitale skjema på nynorsk, melder Khrono.

• Les også: Tydde til sivil ulydnad etter manglande nynorsk i Heimevernet

– Manglar vilje

Den nye språklova, som gjaldt frå 1. januar i år, skjerpar kravet til språkarbeidet, og særleg minoritetsspråk som nynorsk. Kravet er minst 25 prosent nynorsk og bokmål i allment tilgjengelege dokument.

– Det ser ut til at mange manglar vilje til å prioritere språkarbeidet, og at dei ikkje forstår kvifor dei har denne oppgåva, seier direktør i Språkrådet, Åse Wetås til Khrono.

Ho meiner at det i realiteten viser at dei utøver ein språkpolitikk som konkurrerer med den politikken Stortinget har vedteke. Ifølgje lova har heile offentleg sektor ansvar for å fremje nynorsk, og at det kvilar særleg tungt på forskings- og utdanningssektoren.

• Les også: NTNU nedprioriterer nynorsk

Musikkhøgskulen får skryt

Høgskulen i Volda, Universitetet i Bergen og Høgskulen på Vestlandet får ros frå Språkrådet for å ha god balanse i bruken av nynorsk. Også Universitetet i Stavanger får skryt for god framgang. Der er nynorskprosenten no auka til 16.

Også Musikkhøgskulen får ros for at både bokmål og nynorsk er godt synleg og tilgjengeleg på nettsidene, men at dei framleis er langt under målet om 25 prosent.

• Les også: Språkrådet har vedteke å ta «hen» inn i ordbøkene

No kan du søkje opp ordet «hen» i ordboka. Skjermdump ordbøkene.no / Cecilie JOhnsen, Unsplash /kollasj Framtida.no