Ap og Sp samde om å droppe firarkravet i matte i lærarutdanninga

Ap og Sp har vorte samde om å droppe kravet om at studentar må ha minst karakteren fire i matematikk for å komme inn på lærarutdanninga.

– I dag manglar éin av fem som underviser i norsk skule, lærarutdanning, og lærarmangelen aukar. Derfor er det for ei ny regjering veldig viktig å snu denne utviklinga, så alle elevar møte kvalifiserte lærarar som har tid til dei, seier Ap-leiar Jonas Gahr Støre til NRK.

Under regjeringsforhandlingane på Hurdalsjøen Hotell har Ap og Sp vorte samde om nokre hovudpunkt i ein ny skulepolitikk.

• Les også: Seks av ni parti er mot mattekrav for lærarstudentar

Vil gjere om avskiltinga

Punkta på skulepolitikken som no kjem inn i ei ny regjeringsplattform er dei desse:

• Gjere om den såkalla avskiltinga av lærarar utdanna før 2014. Utover dette består kompetansekrava.
• Rekruttere tilbake lærarar som har forlate yrket, ved å utvikle eit eige program for dette.
• Ny nasjonal rekrutteringskampanje til lærarutdanninga, særleg retta mot menn.
• Erstatte inntakskravet på fire i matematikk med meir treffsikre opptakskrav til lærarutdanninga.

Også SV, som forlét sonderingane på Hurdalsjøen Hotell, har vore samd med Ap og Sp om å fjerne firarkravet. Dermed kan dei to partia som truleg dannar regjering, søkje fleirtal i Stortinget hos SV.

• Les også: SV-politikar Solveig Skaugvoll Foss (24) har ikkje god nok mattekarakter til å bli lærar – vil skrota firarkravet

Melby: – Senkar ambisjonane

Kunnskapsminister og Venstre-leiar Guri Melby reagerer på at Ap og Sp vil droppe firarkravet.

– Å redusere kompetansekrava for lærarar vil bidra til å redusere satsinga på systematisk vidareutdanning og kompetanseutvikling, seier ho.

Mathilde Tybring-Gjedde i Høgre meiner at Ap og Sp senkar ambisjonane for læraryrket.

– Etter at vi innførte firarkravet i den enklaste matematikken, er det langt fleire studentar som fullfører lærarutdanninga, og færre som stryk på matematikkeksamen. Det er faktisk det viktigaste for elevane. Det blir ikkje betre undervisning av å senke krava og ambisjonane for kompetansen til lærarane. Det er ein gammaldags quick fix, seier stortingsrepresentanten.

• Les også: Yrket mitt: Fredrik (34) er lærar

Fredrik Georg Svang Jansen er lærar i ungdomsskulen. Foto: Pixabay.com/Privat