Noregs Mållag ønskjer ekstrapoeng for nynorskelevar ved studieopptak
Denne artikkelen er eldre enn 1 år gamal. Det betyr at noko av informasjonen kan vere utdatert.
– Det bør lønne seg å velje nynorsk. Derfor bør forskings- og høgare utdanningsminister Henrik Asheim (H) gi vidaregåande skuleelevar med nynorsk som hovudmål ekstrapoeng ved opptak til høgare utdanning, skriv mållagsleiar Peder Lofnes Hauge i eit lesarinnlegg i Bergens Tidende.
For tida blir det jobba med eit forslag til ny universitets- og høgskulelov. I samband med dette blir dagens ordning med tilleggspoeng vurdert.
– Det kjem stadig forslag om nye tilleggspoeng, men det er ingen som har sett seg ned og sett på summen av alt dette. Derfor kastar vi no alt opp i lufta og tek ein grundig gjennomgang, seier forskings- og høgare utdanningsminister Henrik Asheim til NRK.
- Les også om målrørsla sine reaksjonar på språklova: – Frykteleg skuffande
Lite imponerte
Bokmålsforbundet er lite imponert over forslaget til Noregs Mållag.
– Dette er ikkje noko nytt, men kjende tonar. Nynorsk går tilbake trass i nynorskvennlege lover og 80 millionar kroner i året i direkte støtte, seier formann Steinar Øksengård.
I dag blir det gitt tilleggspoeng for fullført folkehøgskule, militær- eller sivilteneste og studiepoeng frå fagskule og høgare utdanning. Det blir òg gitt ekstrapoeng for alder, realfag og språk, og dessutan i visse tilfelle for kjønn og opptaksprøver.