Forbrukarrådet: Halvparten av unge bruker muskelbyggjande produkt
Ni av ti i alderen 13 til 24 år bruker kosttilskot, og halvparten bruker muskelbyggjande produkt, viser ei ny undersøking. No vil Forbrukarrådet ta grep.
– Vi ser behov for sterkare regulering og betre informasjon for å verne unge menneske mot mogleg skadelege effektar av kosttilskot og aggressiv marknadsføring, seier direktør Inger Lise Blyverket i Forbrukarrådet til NTB.
Tysdag blir hovudfunn presentert frå undersøkinga deira «Press, piller og pulver» på Forbrukarkonferansen. Eit representativt utval på 1056 ungdommar og unge vaksne i alderen 13 til 24 år har svart på spørsmål i juni i år.
Der svarer altså ni av ti at dei bruker kosttilskot, tre av ti at dei opplever kroppspress, og halvparten at dei bruker tilskot for å byggje musklar og å hjelpe musklane til å prestere betre under trening, som til dømes proteinpulver og pre-workout-produkt.
● Les også: Rekordmange unge vil ha treningsdop
Viktig med kropp
Innhaldsmarknadsføringa i sosiale medium og marknadsføringa i nettbutikkar blir prega av veltrena førebilete, openbert kroppsfokus, pakkeløysingar på proteintilskot og kreative og «aggressive» produktnamn.
– Det å få musklar, og det å få musklar raskt, er særleg viktig for gutar og ein viktig drivar for bruken av muskelbyggjande tilskot. Vi ser at nokon erstattar heile måltid med proteinpulver. Med mindre du er kroppsbyggjar, vil proteintilskot i dei aller fleste tilfella vere heilt unødvendig, seier Blyverket.
Forbrukarrådet ønskjer å auke medvitet blant unge om at kosttilskot også kan vere problematisk. Til dømes kan produkt innehalde udeklarerte stoff eller dopingmiddel og vere ein helserisiko. Ikkje minst bruker mange unge pengar på produkt som truleg ikkje har ønskt effekt.
● Les også: Dette er kandidatane til Gullbarbie i år
Vil ha standard merking
Tidlegare rapportar frå Medietilsynet stadfestar at halvparten av dei unge i alderen 13–18 år har fått reklame for slanke- og muskelbyggjande produkt. Kosttilskotsmarknaden veks, og mykje marknadsføring blir retta mot unge.
For å tydelegare vise at det dreier seg om reklame, vil Forbrukarrådet innføre eit standardisert og obligatorisk vassmerke for reklameinnhald i sosiale medium, synleg i heile videoen eller på kvart bilete i ein post. I tillegg vil dei ha betre tilsyn med nettbutikkar ved å auke overvakinga og reguleringa av kosttilskot som blir marknadsførte der.
– Ei obligatorisk merkeordning vil gjere det enklare å sjå om innhald i sosiale medium er «ekte» eller betalt marknadsføring, og vil gjere praksisen vesentleg lettare å følgje for både influensarar og kosttilskotsverksemdene, seier Blyverket.
Dessutan ønskjer Forbrukarrådet å gjennomføre ei grundig evaluering av Fagutvalet for influencermarknadsføring (FIM), som vart oppretta i 2019 for å verne unge mot kroppspress og regulere marknadsføring av kosmetiske produkt og kosttilskot.
Auka perfeksjonisme
På årets forbrukarkonferanse «Forbrukarrådet UNG: Lett å bli lurt?» vil også Opinion UNG presentere ferske tal for trendar blant unge. Marknadsdirektør Tove Botnen i Opinion seier til NTB at dei unge er opptekne av å halde oppe sunne kvardagsrutinar for å bli «den beste versjonen av seg sjølv».
– Unge i den siste undersøkinga er endå meir fokuserte på eiga helse og velvære. Halvparten bruker appar til å loggføre fysisk aktivitet. Jentene loggfører mensen i app og legg til rette kvardagen ut frå kvar dei er i syklusen. Dei vel mat for betre fysisk og mental yting og søkjer stadig etter digitale og mentale «hacks», hjelpemiddel og verktøy som kan hjelpe dei på vegen mot balanse, seier Botnen.
Det er ein heilskapleg tankegang som ikkje berre handlar om trening og fysisk aktivitet, men også om søvn, rutinar, redusert skjermbruk, forbruk – og kosthald.
