Dette er kandidatane til Gullbarbie i år

Meta

Selskapet som eig Facebook og Instagram veit mykje om kvar enkelt brukar.

Det er nyttig når dei skal velje ut reklame som blir vist. Press meiner selskapet veit at barn og unge ofte blir vist reklame som er skadeleg for dei, og vel å ikkje gjere noko med det.

– Å bruke denne kunnskapen til å målrette innhald som spelar på brukarane sine usikkerheiter, er å gamble med den psykiske helsa til barn og unge, skriv Maja Enerhaug Egge, leiar i Press.

EU har også reagert på algoritme-styrt innhald, spesielt retta mot barn, og i Europa må selskapet ta grep.

Good For Me

Dette er eit norsk selskap som sel kosttilskot og har merkevarer som «Betakaroten Gold» og «Hair Luxious».

Fleire har kritisert lovnadane slike selskap gir om kosttilskot.

– Når barn og unge sine førebilete blir brukt for å selje produkt som held ved like samfunnet sine skjønnheitsideal, kjem det ikkje som noka overrasking at mange slit med dårleg sjølvbilete eller sit att med ei uggen kjensle etter å ha skrolla på sosiale medium, seier Egge i pressemeldinga.

Press meiner reklamane deira legg press på unge for korleis dei burde sjå ut, og at selskapet framstiller det som om dei har ei rask løysing på problemet.

Framtida.no har kontakta Good for me. Dei ønskjer ikkje å kommentere saka.

Shein

Ultra-fast fashion-selskapet Shein er nominert for måten dei brukar influensarar og sosiale medium til å skape kjøpe- og klespress blant unge.

På TikTok finst det tallause videoar der påverkarar har handla store mengder klede på nett frå den kinesiske motegiganten og viser fram sine shopping hauls.

– Shein stappar barn og unges feed full av plagg og skaper med det ei forventning om at ein må kjøpe meir for å unngå klespresset, seier Press-leiaren.

• Les også: Motegiganten Shein blir granska etter påstandar om tvangsarbeid