Færre får til å kjøpe sin første bustad
I år har det vore ein nedgang i talet på førstegongskjøparar i Noreg. Fleire av dei som kjøper sin første bustad, deler han med nokon.
Denne artikkelen er eldre enn 1 år gamal. Det betyr at noko av informasjonen kan vere utdatert.
Talet på førstegongskjøparar i Noreg har auka heile vegen sidan 2017. Men dei tre første kvartala i år har det gått nedover, viser fersk statistikk frå Norges Eiendomsmeglerforbund, Ambita og Samfunnsøkonomisk Analyse.
Medan førstegongskjøparane klarte seg godt etter koronautbrotet i 2020 og gjennom 2021, har altså færre komme inn på bustadmarknaden i år.
Kjøper saman
Samkjøperindeksen viser dessutan at mange førstegongskjøparar kjøper saman med andre. Særleg i Oslo har fleire slått seg saman når dei kjøper for første gong.
– Førstegongskjøparane er meir rente- og priskjenslevare enn andre bustadkjøparar. Når renta blir sett opp i eit forrykande tempo, er det inga overrasking at det blir færre førstegongskjøparar, seier administrerande direktør i Norges Eiendomsmeglerforbund Carl O. Geving.
Han trur førstegongskjøparane vil komme sterkt tilbake fordi bruktbustad-prisane vil gå ned.
Illustrasjonsfoto: Tierra Mallorca. Nesten vaksen-logo: Linn Isabel Eielsen
