Lykkemålar slår fast: 2020 er det tristaste året på lang tid

Sidan 2008 har amerikanske forskarar målt lykkenivået i USA ut frå Twitter-meldingar.

Konklusjonen så langt: 2020 er det tristaste året dei siste tolv åra.

Det syner lykkemålaren Hedonometer, som òg er omtalt i podkasten Reply All.

50 millionar meldingar – kvar dag

Dei siste tolv åra har forskarane Chris Danforth og Peter Dodds, begge matematikarar og informatikarar, freista måle lykkenivået i den amerikanske befolkninga.

Det gjer det ved hjelp av Twitter – der folk deler tankane sine på løpande band. Sidan 2008 har forskarane fått tilgang på 10 prosent av alle Twitter-meldingane som vert lagde ut. I 2020 er det kring 50 millionar meldingar kvar einaste dag.

Ut frå Twitter-meldingane målar lykkemålaren pulsen på den engelskspråkelege befolkninga: Kor lykkelege er dei i dag?

• Les også om då homofile menn kuppa emneknaggen #Proudboys frå høgreekstreme

Ulykkelege koronaord

10 000 ord har fått sin eigen «lykkepoengsum», på ein skala frå 1 (ulykkeleg) til 10 (lykkeleg), og for å finkalibrere analyserer også hedonometeret ei rekkje tekstar der humøret er tydeleg – som Dostojevskij sitt deperimerande storverk Forbrytelse og straff.

På lykketoppen ragar ord som laughter, love og happiness og på botn er ord som suicide og terrorist.

Sidan språket alltid er i utvikling vert ord kontinuerleg lagt til og fjerna, noko som òg er tydeleg av nykomarane på årets ulykkelege toppliste: coronavirus, ventilator og quarantine.

Stadig nye ulykkelege botnnoteringar

Sidan 2015 har lykkemålaren peika nedover – folk vert stadig meir ulykkelege på Twitter.

Før årsskifte var botnpunktet på hedonometeret frå 2017, då det var ei grufull masseskyting i Las Vegas 1. oktober. Heile 58 personar vart drepne og 700 såra, i det som var den mest dødelege masseskytinga utført av ein person åleine, i moderne amerikansk historie.

Så starta 2020, og nye botnrekordar vart sette gong på gong.

Første ny botnrekord kjem 12. mars, då verda på alvor startar å fatte omfanget av koronapandemien.

Rekorden stod ikkje meir enn dryge to månadar, for 25. mai markerer ein ny botn. Då dukkar videoen av at ei kvit dame trugar med å ringe inn ei falsk valdsanklage mot ein afroamerikansk fuglekikar på nett. Det er også dagen då George Floyd døyr.

Men Twitter-brukarane har aldri vore så ulykkelege som 31. mai.

Då har Black Lives Matter-demonstrasjonane i kjølvatnet av drapet på George Floyd byrja, og orda som florerer på Twitter er: terrorist, protest, violence og racist.

– Dette er ei traumatisert befolkning, seier Peter Dodds i podkasten.

Bilee frå ein Black Livest Matter-demonstrasjon i New York, søndag 14. juni 2020. Foto: AP Photo/Kathy Willens

Vanlegvis plar lykkenivået stige til normalnivået etter ein dag eller to, ifølgje Reply All, men med dei pågåande protestane mot politibrutalitet er amerikanarane uvanleg ulykkelege i ein heil månad.

– Der var ein heil månad – og dette ser vi aldri – der var ein heil månad med dagar, som hedonometeret las som tristare enn Boston maraton-dagen, seier Chris Danfort til New York Times, og viser til bombeåtaket i Boston i 2013.

– Det var verkeleg merkverdig at instrumentet, for første gong, viste dette vedvarande, deprimerte humøret, og så vart det endå verre, då protestane starta, held Danfort fram til avisa.

• Les også intervjuet med dei Afryea-gründarane som tek eit oppgjer med rasisme i skulen: – Vi har vore den brune jenta i skulegarden

Inga glede så stor som julegleda

Men det er ikkje berre elende, det er òg nokre lyspunkt.

Dei siste tolv åra har Twitter-brukarane lykkeleg samla seg rundt hendingar som då prins William og hertuginne Kate gifta seg, då likekjønna ekteskap vart lovleg i USA, eller om ei Kpop-stjerne har bursdag. Men utslaga er små.

Det er nemleg berre eitt høve som gjer at lykkenivået til dei engelskspråklege Twitter-brukarane stig gjennom taket, år etter år: Første juledag.

Slik ser 2020 så langt ut på hedonometeret: 

Skjermdump Hedonometer.org.

Treng du litt godt nytt? Dette er mennene som har gjeve oss håp i 2020

Kollasj: David Attenborough (Foto: Joel C Ryan/Invision/AP), Herman Flesvig (Foto: Terje Bendiksby / NTB). Marcus Rashford (Foto: (Paul Ellis/Pool via AP).