Varmaste vinter i Noreg målt på 120 år

Vinteren var heile 4,5 grader varmare enn normalen, og vart dermed den mildaste sidan Meteorologisk institutt starta målingane i 1900. Denne vinteren vart òg den nest våtaste.

Alle regionane utanom Nord-Noreg sette rekord for varmaste vintersesong.

• Les også: Kan bli temperaturrekord over 100 stader i landet: – Viser at klimaendringane er her

Vinteren 2019/2020 i Noreg er den varmaste som er målt i landet sidan målingane byrja for 120 år sidan. Her kikar ein blåveis fram i vegkanten på Svartskog like utanfor Oslo 15. februar i år. Foto: Cornelius Poppe / NTB scanpix / NPK

19 grader og noregsrekord

Ytterøyane fyr i Vestland sette rekord for høgaste gjennomsnittstemperatur i ein vintersesong med 6 grader. Den gamle rekorden var frå sesongen 2013/2014, då Svinøy i Møre og Romsdal enda på 5,7 grader.

Høgaste maksimumstemperatur denne sesongen var på heile 19 grader, og vart registrert 2. januar i Sunndalsøra i Møre og Romsdal. Dette er ny norsk varmerekord for januar.

Lågaste minimumstemperatur var – 38,6 grader, og vart målt i Couvddatmohkki i Finnmark 28. januar.

• Les også: Klimaforskarar: Verda har ikkje sett normalt vêr sidan 2012

Nest våtaste vinter sidan 1900.

For landet som heilskap kom det 70 prosent meir nedbør samanlikna med normalperioden 1961–1990-normalen.

Det vart dermed den nest våtaste vinteren målt sidan 1900. Berre vinteren 1988/89 var våtare, med 85 prosent meir nedbør enn normalen.

Høgaste døgnnedbør var 155,2 millimeter, og vart målt på stasjonen Samnanger II i Vestland 30. desember.

Også globalt har det vore varmerekord, og 2020 er det 44. året på rad der temperaturen i den første månaden i året ligg høgare enn det som var normalt i førre hundreår.

• Les også: Global oppvarming: Slik reknar ein ut temperaturauken

Forskarar treng målingar av både land- og havtemperatur for å kunne rekna ut temperaturutviklinga. Foto frå Sula i Møre og Romsdal. Foto: Ståle Prestøy cbd, Universitetet i Bergen