Han var verdas sjeldnaste fugl. No er populasjonen meir enn tidobla
Fuglen som det på syttitalet berre var fem igjen av, er no kåra til årets fugl i New Zealand.
Den newzealandske fuglen black robin (norsk: mangereflueskvett) vart nesten utrydda på grunn av tap av habitat og framande sjukdommar.
No har han blitt kåra til årets fugl i New Zealand. Det skriv The Guardian.
Over 100 000 røysta i konkurransen, som vart starta for tjue år sidan for å auke oppmerksemda rundt New Zealands innfødde fuglar. Mange av dei er nemleg utryddingstrua.
Den vesle fuglen hadde så få som fem individ igjen på syttitalet. Takk vere eit nyskapande avlsprogram er det no omtrent 350 vaksne fuglar.
– Dei er veldig søte, seier talsperson for the Chatam Islands Landscape Restoration Trust Jess Mackenzie til The Guardian.
Sjølv om avlsprosjektet vart vellykka, er arten framleis sårbar, ifølgje Mackenzie.
Fuglane held til på Chatham-øyene, som ligg aust for New Zealands hovudøyer. Kapasiteten på leveområda deira er framleis sprengd, men populasjonen har blitt veldig styrka.
