Vekas viktigaste: Bombing i Iran, kronprinsesse-intervju og brann i Ålesund

Trump trugar med å bombe iransk gassfelt

Israel gjekk til åtak på det store gassfeltet South Pars i Iran onsdag, skriv VG. Det førte til at Iran truga med å gå til åtak på gass- og oljefelt i dei andre golfstatane, og skaut missil mot Qatar og Saudi-Arabia.

Amerikanske styresmakter seier dei ikkje var klar over at Israel planlagde åtaket. Som svar på åtaka frå Iran, truga president Donald Trump med å sprengje heile South Pars-feltet, uavhengig av Israel.

Dei tre vekene med krig har hatt enorm påverknad på prisane på olje og gass. Varetilgangen til forskjellige land blir også påverka, fordi skip hopar seg opp i Persiabukta, sidan Iran skal ha lagt miner i Hormuzsundet.

Over 10 millionar menneske utan straum på Cuba

Etter 29 timar utan straum fekk Cuba kopla på straumnettet att tysdag ettermiddag, ifølgje al-Jazeera. Landet har vore i ei energikrise etter USA gjekk inn i Venezuela og stansa oljeeksporten til Cuba i januar.

Dette er det første store straumbrotet etter at eksporten vart stansa, men styresmaktene seier det kan bli fleire brot, sidan det største oljekraftverket deira ikkje produserer nok straum.

Samstundes med straumstansen sa den amerikanske presidenten Donald Trump at han vil «ha æra av å ta Cuba».

– Altså, om eg skal frigjere øya, ta ho … Eg trur eg kan gjere kva eg vil med ho, om eg skal vere ærleg. Veldig svekt nasjon akkurat no, sa han til pressa ifølgje Forsvarets Forum.

Den cubanske presidenten Miguel Díaz-Canel kritiserer USA for det han kallar daglege trugslar mot landet hans.

Cubanske styresmakter skal vere i dialog med amerikanske styresmakter, men innhaldet i samtalene er førebels ikkje kjent.

Brann i Ålesund

Torsdag fekk dei 300 personane som var evakuerte i Ålesund etter lyngbrannen som braut ut tysdag, lov til å flytte heim, skriv NRK. Brannen var i terrenget ved Sukkertoppen, som ligg på den vestre øya Hessa, der folk vart evakuerte frå.

Brannvesenet var ei stund bekymra for at brannen kom til å spreie seg til bustadfeltet. Dei fekk ikkje kontroll på brannen før onsdag, då vêret gjorde at dei kunne bruke brannhelikopter.

Sjølv om brannen er under kontroll, er det framleis ferdsels- og opphaldsforbod fram til klokka 14 på fredag.

Politiet undersøker årsaka til brannen, men har ingen mistenkte, og vil gjerne ha tips.

Lyspunkt: Noreg klatrar på lykkemåling

Noreg er det sjette mest lykkelege landet i heile verda, ifølge Verdas lykkerapport frå FN, som vart publisert denne veka. Det betyr at vi har klatra éin plass opp frå sjuandeplassen i fjor.

20. mars er FN sin internasjonale dag for lykke, der dei fokuserer på at lykke og velvære er eit mål for alle menneske på jorda.

Nabolanda våre er også i toppen, med Finland som det lykkelegaste landet i verda. Etter det kjem Island og Danmark på andre- og tredjeplass. Costa Rica i Mellom-Amerika er på fjerdeplass, og Sverige er på femteplass.

Årets rapport ser særleg på korleis sosiale medium kan påverke livskvaliteten til unge, og merkar seg at lykka blant unge under 25 år har gått noko ned i vestlege land.