Vekas viktigaste: Korrupsjonssiktingar, val i Bangladesh og skyting i Canada

Jagland og Juul sikta for grov korrupsjon

Over 50 migrantar døydde i båtkantring i Middelhavet

Ein gummibåt med migrantar velta ved kysten utanfor Libya førre veke. Minst 53 personar, inkludert to spedbarn, er sakna eller stadfesta døde, ifølgje International Organization for ‌Migration (IOM).

To overlevande skal ha fått medisinsk hjelp av IOM. Dei har fortalt at båten drog frå Zawia i nordvest-Libya, og at han velta etter om lag seks timar. Det var flyktningar og migrantar frå afrikanske land om bord i båten.

Med dette er det rapporterte talet på døde og sakna migrantar 484 på ruta som kryssar det sentrale Middelhavet så langt i 2026. IOM reknar med at det er mørketal på fleire hundre. I fjor vart det registrert over 1300 døde og sakna migrantar på ruta.

Demokratisk val i Bangladesh

Nasjonalistpartiet i Bangladesh (BNP) har erklært siger etter valet til ny nasjonalforsamling på torsdag, skriv VG. USA og India gratulerer partiet med sigeren fredag morgon.

Førebels ser det ut som partiet får 212 representantar i forsamlinga. Dei må ha 150 for å få fleirtal. Det islamistiske opposisjonspartiet Jamaat-e-Islami får 56 representantar i opposisjon, og har anerkjent at dei har tapt.

Dette valet blir sett på som det første demokratiske valet i landet sidan 2009, då Sheikh Hasina vart statsminister. Under Hasina var partiet Jamaat-e-Islami forbode.

I 2024 gjekk ho av som statsminister på grunn av store demonstrasjonar, der rundt 1400 menneske døydde.

I november 2025 dømte Bangladesh Hasina til døden for blant anna å ha stått bak politivalden under demonstrasjonane. Ho bur i eksil i India, som ikkje vil utlevere den tidlegare statsministeren.

Hennar eige parti, Awami-ligaen, fekk ikkje lov til å stille til val i år.

Åtte drepne i masseskyting i Canada

Minst 35 døde etter syklon på Madagaskar

Minst 35 personar er døde etter at den kraftige syklonen Gezani trefte Madagaskar tysdag, skriv BBC. 250 000 menneske er råka eller fordrivne av det kraftige uvêret, ifølgje miljøminister Max Fontaine Andonirina.

Syklonen trefte øya sin austlege kyst med ein vindstyrke på opptil 70 meter per sekund. Toamasina, Madagaskars nest største by, blei spesielt hardt råka, skriv NTB. Ifølgje president Michael Randrianirina blei nesten 75 prosent av Toamasina øydelagt.

Lyspunkt: Stor nedgang i meslingtilfelle i Europa

I fjor fall talet på meslingtilfelle med 75 prosent i Europa og Sentral-Asia samanlikna med året før, opplyser Verdas helseorganisasjon (WHO).

I 2024 opplevde Europa ein stor auke i tilfelle av den smittsame sjukdommen. I WHOs Europa-region vart det i 2025 meld 34 000 tilfelle av meslingar, mot 127 000 i 2024. Tala inkluderer òg Russland og delar av Sentral-Asia, skriv NTB.

WHO trekker fram smitteverngrep som ei årsak til den store nedgangen. I tillegg har fleire i befolkninga blitt immune, då viruset har spreidd seg blant uvaksinerte.

Trass nedgangen er WHO bekymra for nye utbrot.