Du har flest nasehår i venstre nasebor – dette er den raraste forskinga

Kjemi og geologi: Forskarar slikkar på stein

Korleis veit du som geolog kva stein du har funne? Og kan ein eigentleg kalle seg sjølv arkeolog dersom ein ikkje har slikka på stein og keramikk for å finne ut skilnaden?

Prisen for kjemi og geologi gjekk til den polske professor emeritusen Jan Zalasiewicz frå University of Leicester som forklarer kvifor så mange forskarar likar å slikke på steinar. I artikkelen «Eating fossils» skildrar han slikking som eit av fleire nyttige vitskaplege verktøy når ein forskar er i felten.

(Foto: Annie Spratt via Unsplash)

Litteratur: Framandgjeringa ved å gjenta ord mange, mange, mange, mange, mange gonger

Deja Vu er når du opplever noko for fyrste gong, men det kjennest som om du har opplevd det før.

Jamais Vu er derimot det motsette: noko du eigentleg har opplevd før kjennest framandt.

Det er dette fenomenet Nicole Bell og Akira O’Connor frå University of St. Andrews, Chris Moulin frå Université Grenoble Alpes, Merita Turunen frå Helsingin yliopisto og Arina Baharin frå Malaysia har forska på, blant anna ved å gjenta ord fleire gonger slik at dei mista meininga si.

(Foto: Åshild Slåen)

Mekanisk ingeniørkunst: Døde edderkoppar kan halde verktøy

Kva kan ein bruke kroppen til døde edderkoppar til? Forske på «nekrobotar» som kan halde verktøy, er det Zhen Liu frå Université de Montréal, og Te Faye Yap, Trevor J. Shimokusu, Daniel J. Preston og Anoop Rajappan frå Rice Univeristy, har funne ut.

Edderkoppar har ei unik evne til å gripe ting, og det å bruke om att slike eigenskapar til dyrekroppar etter dei er døde, kan gi interessante resultat for robot-forsking.

(Foto: Victor Grabarczyk via Unsplash)

Folkehelse: Smarte toalett

Ein kan finne ut mykje av å analysere avføring. Det er i alle fall tanken bak det «smarte» Stanford Toalettet, oppfunnen av Seung-min Park frå Stanford University, som kan overvake helsetilstanden til nokon ved hjelp av avføringa deira.

Dette er ikkje nødvendigvis etisk i alle tilfelle, men det er ei god oppfinning!

(Foto: Jan Antonin Kolar via Unsplash)

Kommunikasjon: Fonetikken til folk som kan prate baklengs

Det er utruleg mange språklege variasjonar det går an å forske på, men svært lite forsking som er gjort på dei som er ekspertar til å prate baklengs. Det synast i alle fall prisvinnarar María José Torres-Prioris, Diana López-Barroso og Marcelo Berthier frå Universidad de Málaga, Estela Càmara frå IDIBELL – Instituto de Investigación Biomédica de Bellvitge, Sol Fittipaldi frå Universidad de San Andrés, Lucas Sedeño frå Universidad de Buenos Aires, Agustín Ibáñez frå BrainLat Instituttet, og Adolfo García frå Universidad de San Andrés.

Dei har publisert ein nevrolingvistisk studie som nettopp tek for seg hjerneaktiviteten til to ekspertar på baklengstale. Eller elatsgnelkab som dei kanskje vil kalle det.

(Foto: Steven Erixon on Unsplash)

Medisin: Har kadaver like mange nasehår i kvart nasebor?

Nokre spørsmål må ein verkeleg vere oppfinnsam for å kome på. Eit av dei er om ein har like mange nasehår i kvart nasebor.

Svaret til prisvinnarane Christine Pham, Bobak Hedayati, Kiana Hashemi, Ella Csuka, Tiana Mamaghani, Margit Juhasz, Jamie Wikenheiser, og Natasha Mesinkovska frå University of California Irvine er nei. Det er i snitt 120 nasehår i venstre nasebor, og 112 i høgre.

Dette fann dei ut ved å undersøke menneskekadaver.

(Foto: Waldemar on Unsplash)

Ernæring: Elektrisitet endrar smaken på mat

Har du nokon gong lurt på korleis smaken til mat endrar seg dersom det blir tilført elektrisitet?

Det lurte i alle fall Homei Miyashita and Hiromi Nakamura frå Meiji University på, og dei har no vunne IgNobel-prisen i ernæring basert på forsøka sine med elektrifiserte sugerøyr og spisepinnar.

(Foto: Meghan Rodgers on Unsplash)

Utdanning: Lærarar og studentar som kjedar seg

Når du trur du kjem til å kjede deg, så kjedar du deg endå meir. Det er ein del av konklusjonen til prisvinnarar Katy Tam, Christy Wong, Vivian Kwong, Gigi Yuen og Christian Chan frå University of Hong Kong, Cyanea Poon frå University of Massachusetts, Victoria Hui, og Wijnand van Tilburg frå University of Essex .

Nøyaktig kvifor desse forskarane syntest det var nødvendig å forske metodisk på både lærarar og studentar som kjedar seg er usikkert, men kanskje det var litt for mange sovande studentar i forelesingane deira.

(Foto: Tony Tran on Unsplash)

Psykologi: Folk som stoppar for å sjå opp når dei ser andre gjere det

Om alle andre hadde hoppa av ei bru, ville du gjort det same? Kanskje.

Men kva om du såg ein person på gata som såg opp i vêret. Ville du ha stoppa opp for å gjere det same?

Det undersøkte prisvinnarane innan psykologi, Stanley Milgram, Leonard Bickman, og Lawrence Berkowitz frå The City University of New York.

Dette illustrerer forresten at det aldri er for seint å vinne ein IgNobel, for denne forskinga vart originalt publisert for fleire tiår sidan.

(Foto: Taylor Smith via Unsplash)

Fysikk: Ansjos-sex fører til blanding av havvatn

Store stimar med ansjos som symjar saman i paringstida kan påverke havvatnet rundt.

Det viser forskinga til prisvinnarar Bieito Fernández Castro og Alberto C. Naveira Garabato frå University of Southampton, Marian Peña og Enrique Nogueira frå Instituto Español de Oceanografia, Miguel Gilcoto frå Instituto de Investigaciones Marinas, Esperanza Broullón, Beatriz Mouriño-Carballido og Antonio Comesaña frå Universidade de Vigo, og Damien Bouffard frå Eawag.

Med andre ord, dei beveger ikkje himmel og jord, men kjærleiken deira beveger absolutt havet.

(Foto: Diane Helentjaris on Unsplash)