AUF krev handling frå moderpartiet i Fosen-saka
Denne artikkelen er eldre enn 1 år gamal. Det betyr at noko av informasjonen kan vere utdatert.
Fredrik Sørlie er sentralstyremedlem i AUF. Foto: AUF
– Vi i AUF har ei klar forventning til regjeringa. Ein er nøydde til å gjere noko med dette menneskerettsbrotet, dette overgrepet mot den samiske befolkninga, så raskt som mogeleg.
Det seier sentralstyremedlem Fredrik Sørlie til NRK, som først omtalte saka.
AUF-medlemmen meiner det er hårreisande at det har gått over 500 dagar sidan Fosen-dommen fall, utan at ein har bestemt kva som skal skje med vindmøllene i reinbeiteområdet.
Ungdomspartiet har ikkje sjølv teke stilling til kva dei meiner bør skje – det tek dei først på landsstyremøtet seinare i mars.
Tre ungdomsparti meiner vindmøllene må ned
NRK har ringt alle ungdomspartia for å høyre kva dei meiner bør skje med Fosen-vindmøllene.
Verken Senterungdommen, Framstegspartiets ungdom, Unge Venstre eller Kristeleg Folkepartis Ungdom har teke endeleg standpunkt i saka.
Raud Ungdom, Sosialistisk Ungdom og Grøn Ungdom er alle tydelege på at vindturbinane på Fosen må verte rivne.
Grøn Ungdom-talsperson Margit Martinsen er tydeleg på at landet må verte ført tilbake til reindriftssamane og at ein må sørgje for at dette aldri skjer igjen.
– Vi kan ikkje skape ein politisk kultur der ein tvinger gjennom tiltak først, og sjekkar lovlegheita etterpå, seier ho til NRK.
