Regjeringa går mot Miljødirektoratet – Natur og Ungdom varslar sivil ulydnad

Gina Gylver er leiar i Natur og Ungdom. Foto: Thor Due/Natur og Ungdom

– I staden for å lytte til kunnskapen vel regjeringa å tvinge gjennom ei unødvendig monsterutbygging, seier Gina Gylver i ei pressemelding.

Natur og Ungdom-leiaren reagerer på at regjeringa førre veke opna for å byggje ny E6 gjennom naturreservatet Lågendeltaet i Lillehammer.

I helga vedtok landsstyre i miljøorganisasjonen at dei skal aksjonere med sivil ulydnad om arbeidet startar.

– Å bryte lova er verken noko vi tek lett på, eller noko vi ønskjer å gjere, seier leiaren.

• Les også: Vanessa Nakate (26) er nominert til Nobels fredspris – kritiserer Noreg for hykleri

Går mot Miljødirektoratet

Miljødirektoratet sa i desember nei til planen om å byggje ein firefelts motorveg gjennom naturreservatet. Direktør Ellen Hambro sa då at vilkåra for å gje dispensasjon ikkje var oppfylte.

– Verneområde vert oppretta for å ta vare på svært verdifull natur, og vernet er meint å vere varig, sa direktøren i ei pressemelding.

Naturreservatet vart oppretta for å verne eit viktig og spesielt våtmarksområde, og dyrelivet som bur der. 10,5 prosent av dei truga artane i Noreg lever i våtmark og 86 prosent av desse artane er truga av arealendringar, ifølgje direktoratet.

Klima- og miljøminister Espen Barth Eide Foto: Cecilie Stuedal

Regjeringa overprøvde likevel Miljødirektoratet.

– Det skal vere ein svært høg terskel for å tillate inngrep i verneområde. I dette tilfellet meiner regjeringa samla sett at dette er den beste løysinga når ein ser alle omsyn samla.

Det sa klima- og miljøminister Espen Barth Eide (Ap) i ei pressemelding førre veke.

Han peika på at regjeringa vil verne erstatningsareal og finne nye tiltak for å redusere miljøulempene ved vegprosjektet samla sett.

• Les også: Den tyske landsbyen Lützerath skal jamnast med jorda – Elise (20) reiste for å stoppe det

– Heilt hinsides

– Når regjeringa opnar for å endre vernet straks det passar dei, er det ikkje berre ein trugsel mot det verdifulle Lågendeltaet. Det er ein trugsel mot naturens rettssikkerheit, og dermed også vårt livsgrunnlag, seier NU-leiar Gina Gylver.