DNT ung ber politikarane få fart på sirkulærøkonomien – kjem med fem krav
Denne artikkelen er eldre enn 1 år gamal. Det betyr at noko av informasjonen kan vere utdatert.
DNT ung har sidan 2016 arrangert Grøn Fredag som eit motsvar til forbruksfesten Black Friday. Ungdomsorganisasjonen opplever at mange er interesserte i korleis dei kan ha meir berekraftige liv.
Anna Nes, leiar i DNT ung meiner at det er bra at folk engasjerer seg, men meiner at politikarane burde ta meir ansvar. I ei pressemelding set ho fem berekraftskrav til politikarane.
👕 Gjer det lettare å handle brukt
– Vi må få vekk hinder for brukthandel, blant anna gjennom å skrote brukthandellova som er utdatert. Der er det gledeleg at næringsministeren har varsla ei endring, som vi og andre har utfordra departementet hans på fleire gonger.
- Les også: – Det må bli enklare å drive bruktbutikk
🧵 Stimuler til meir reparasjon
– Det må vere enklare og billigare å reparere enn å kjøpe nytt. Derfor må politikarane finne måtar å stimulere til meir reparasjon på. Det kan til dømes gjerast gjennom å påleggje produsentane å lage produkt som er lettare å reparere, eller å fjerne moms på fiksing.
📣 Anerkjenn systemproblemet
– Samvitsfulle unge folk kan ikkje redde verda åleine. Dette er ikkje berre ansvaret til forbrukarane, og dei folkevalde må erkjenne at det enorme forbruket er eit systemproblem.
♻️ Sats meir på utlånsordningar
– Fritidsaktivitetar kan krevje mykje utstyr. Derfor må styresmaktene på ulike nivå satse meir på utlånsordningar. Det er bra for lommeboka og for miljøet om vi deler meir, i staden for at alle skal eige kvart sitt.
📄 Løft fram delingsøkonomi i ei stortingsmelding
– Deling må vere den nye normalen, men politikarane må bruke tid på å finne ut korleis. Derfor ønskjer vi oss ei stortingsmelding om delingssamfunnet og delingsøkonomi.
- Les også meiningsinnlegget: «Bli med på å farge november grønt – ikkje svart»
Les også: Dette bør du sjekke dersom du kjøper friluftsutstyr brukt
Foto: Marius Dalseg Sætre/DNT
