Miljørørsla rasar mot statsbudsjettet: «Flaut», «absurd», «uforståeleg»
Stor misnøye med regjeringa sitt miljøbudsjett.
Denne artikkelen er eldre enn 1 år gamal. Det betyr at noko av informasjonen kan vere utdatert.
Miljørørsla: Statsbudsjettet er flaut
Torsdag føremiddag blei forslaget til neste års budsjett lagt fram. Regjeringa meiner dei forsterkar klima- og miljøprofilen, og aukar pengepotten med 1,3 milliardar kroner. Kor stor den totale pengepotten er, kan dei likevel ikkje seia.
– Det er fordi mange løyvingar har element av miljø og klima utan at ein kan seie kor stor den andelen er, melder kommunikasjonsseksjonen i Klima- og miljødepartementet.
Les alt om statsbudsjettet her!
Miljøorganisasjonar er ikkje nøgde med budsjettforslaget.
– Me saknar ei større satsing på klima, miljø og kutt av klimagassutslepp. Forslaget til statsbudsjettet gjer ikkje nokon store endringar i den største kjelda til forureining me har, nemleg olje, seier 2. nestleiar i Natur og Ungdom (NU), Magnus Storvoll Strømseth til Framtida.no.
Absurd politisk teater
Nokre satsingsområde for regjeringas klima- og miljøprofil er støtte til klima- og skoginitiativet som skal få ned klimagassutslepp frå avskoging og skogforringing i utviklingsland samt meir penger til utbygging av jernbanen.
– Samtidig med utbygging av jernbane skal det bli bygd meir veg. Regjeringa har tydelegvis ikkje forstått at det ikkje nyttar å bygge meir veg dersom me skal flytte passasjerane over til tog, meiner Storvoll Strømseth i NU.
Leiar i Framtiden i våre hender, Anja Bakken Riise, er einig.
– Regjeringa driv eit absurd politisk teater. Regjeringa kunne valt å auke moms på miljøskadeleg forbruk, men vel i staden å gjere kollektivtransport, el-bil og miljøvennlege opplevingar dyrare. At løyvingane til jernbane auker noko blir spist opp av massiv satsing på veg smat kutt i støtte til gang- og sykkelvegar. Dermed blir ikkje dette eit budsjett for grøn omstilling, seier Bakken Riise.
– Jobbar mot FN-konvensjon
Regjeringa føreslår å setje av 3 milliardar kroner i 2018 til initiativ som skal ta vare på regnskogen. Det tilsvarar ei auke på 118 millionar kroner frå 2017.
– Men regjeringa har kutta penger til regnskogen dei siste åra, så sjølv om det er ein auke er det totalt sett mindre auke, meiner miljøpolitisk leiar i Verdas naturfond (WWF), Ingrid Lomelde.
– Klima- og skoginitiativet er det største internasjonale miljøtiltaket til Noreg. Me i WWF skulle gjerne sett meir satsing på det området sidan skogvern er bra for både naturmangfald og klima, seier Lomelde.
Miljøorganisasjonen Sabima jobbar for å stoppe tapet av naturmangfald. Dei skriv i ei pressemelding at statsbudsjettet for 2018 jobbar mot FNs konvensjon for biologisk mangfald.
– Det er ingen satsing på noko av dei tiltaka som verkeleg kan stanse tapet av naturmangfaldet i Noreg. Regjeringa kutter derimot med 200 millionar kroner, skriv Sabima.
- LES OGSÅ: Regnskogen kan redde klimaet
Fryktar meir matsvinn
Regjeringa forplikta seg til å halvere matsvinnet i Noreg innan 2030, men no blir matkastelova som kan påleggje butikkane å gje bort overflødig mat til velgjerdshjelp skrinlagt.
– I tillegg blir støtten til bransjeorganisasjonen Matvett og Matsentralen i Oslo kutta. Eg fryktar at dette budsjettet vil auke matsvinnnet i Noreg, seier Bakken Riise i Framtiden i våre hender.
- FÅ OGSÅ MED DEG: Reduserer matsvinn med ny app
Bellona ser svært alvorleg på at regjeringa kuttar løyvingane til teknologi for fangst og lagring av CO2-utslepp frå industrien.
– Medan dei burde ha løyva minst 400 millionar kroner til fullskala CO2-fangst for industrien, kuttar dei i staden frå 360 til berre 20 millionar kroner, seier seniorrådgivar Olav Øye i Bellona.
Han kallar kuttet uforståeleg, og meiner Høgre og Frp har misforstått.
– I staden for å kutta CO2-utslipp, har regjeringa kutta pengar til klimatiltak, seier Øye.
