Vekas viktigaste: Ny konge, dyr diesel og tause politikarar

Kongens eid

Kong Haakon avla eid i stortingssalen tysdag. Då lova han å regjere landet i samsvar med grunnlova og lovene, og å utføre gjerninga si for land og folk.

Haakon vart automatisk konge då Harald døydde, men Grunnlova krev likevel at han avlegg eid og forpliktar seg til å vere lojal mot Stortinget. Denne eiden markerer at makta til kongen er avgrensa.

Regjeringa og stortingsmedlemmane var i salen. Det var også sametingspresidenten og forsvarssjefen.

Båra til kong Harald ligg no i Slottskapellet, som er ope for såkalla defilering. Gravferda er 9. september.

Også Ingrid Alexandra har signert eiden som tronarving.

• Les også: – Det handlar ikkje om å sørge på «rett» måte

Drivstoffprisane stig – politikarane er tause

1. september steig prisane på drivstoff i heile Noreg, då vegbruksavgifta og CO₂-avgifta tredde i kraft for fullt igjen.

Dermed auka avgiftene på diesel med 4,51 kroner, og bensin med 4,71 kroner denne veka. Nokre stader har pumpeprisen derimot auka endå meir. Avisa iFinnmark melde om prisauke på 6,75 kroner på bensin ved ein Esso-stasjon i Alta.

Stortinget vedtok i vår – mot viljen til regjeringa – å kutte i avgiftene på drivstoff midlertidig for å skåne bilistar og yrkestrafikken mot høge oljeprisar etter at Iran stengde Hormuzsundet.

Mange uttrykker frustrasjon over høgare drivstoffprisar, men politikarane er tause. Dei politiske partia i Noreg har nemleg inngått ein såkalla «borgfred» etter kong Haralds død. Det betyr at dei er einige om å ikkje komme med politiske utspel som ikkje er «strengt naudsynte» fram til gravferda til kong Harald 9. september.

Senterpartiet tok onsdag initiativ til ein diskusjon om borgfreden, men vart avviste av dei andre partia.

1200 døde etter flaumen i Nepal

Over 1200 er stadfesta døde og over 4200 er sakna etter flaumkatastrofen i Nepal og Tibet. Store bølger med gjørme, steinar og tre øydela byar, vegar, bruer og demningar over ei strekke på nesten 170 kilometer.

Styrtflaumen vart forårsaka av ein isbre som kollapsa og sende store mengder is og stein ned i elveløpa i ein dal ved grensa mellom Nepal og Tibet, skriv NTB.

Ved Tribhuvan Trishuli vidaregåande skule slo rektoren alarm akkurat i tide til å evakuere 900 elevar. Ti minutt seinare vart skulebygget slukt av massane.

I distriktet Nuwakot, som er blant dei hardast råka, har familiar halde symbolske gravferder for sakna slektningar. Samstundes har styresmaktene i Nepal gravlagd lik i mellombelse graver i påvente av identifisering.

Vekas lyspunkt: Plantar skog med drone

Norske utviklarar har laga ein drone som kan plante tre i område som er vanskeleg å komme til, til dømes på grunn av terrenget eller at dei ligg langt frå veg. Det skriv NRK.

– Å kunne plante effektivt i dei areala vil vere eit stort fortrinn for norsk skogbruk, seier Bjørn Håvard Evjen, administrerande direktør i Norges Skogeierforbund til NRK.

Forskingsdirektør Rasmus Astrup ved Norsk institutt for bioøkonomi (NIBIO) påpeiker at treplanting er hardt arbeid, og at det kan vere vanskeleg å få tak i arbeidskraft.

Dronane kan også skaffe data om enkelttre og helsetilstanden til skogen, som kan hjelpe skogeigarane med å ta betre avgjerder.