Vekas viktigaste: Narkobaron drepen, Island vurderer EU-medlemskap og Pakistan erklærer krig

Fleirtal for lobbyregister på Stortinget

Det er fleirtal på Stortinget for å greie ut eit såkalla lobbyregister, etter at Ap har snudd i saka denne veka.

Føremålet med eit lobbyregister er å ha ei offentleg liste over kva personar og organisasjonar som møter og prøver å påverke politikarar på Stortinget.

– Folk har krav på å vite kven som påverkar dei folkevalde. Det er ikkje noko mistenkeleg i at organisasjonar og bedrifter tar kontakt med politikarar, men det skal skje i ope lys, ikkje bak lukka dører, seier Venstre-leiar Guri Melby til NRK.

Venstre har lagt fram forslaget, med støtte frå MDG, Raudt og SV. Også KrF, Sp og H har snudd til å bli positive til eit lobbyregister.

Saka har vorte særleg aktuell etter avsløringane om korleis den dømde seksualforbrytaren Jeffrey Epstein pleidde omgang med mektige menneske, inkludert ei rekke norske samfunnstoppar.

Drapet på Mexicos «mest ettersøkte» utløyser kaos

Narkobaronen Nemesio Oseguera Cervantes (59), også kjent som «El Mencho», vart drepen under ein militæroperasjon for å arrestere han, opplyste det meksikanske forsvarsdepartementet denne veka.

Cervantes leia narkokartellet Jalisco New Generation (CJNG), som står bak smugling av store mengder kokain, metamfetamin og fentanyl til USA. USA tilbydde ein dusør på 15 millionar dollar for informasjon som leia til at «El Mencho» vart fanga.

CJNG svara på aksjonen ved å tenne fyr på bilar, bygge vegsperringar og angripe tryggingsstyrkar i åtte statar i Mexico. Byen Guadalajara, som er ein av vertsbyane for sommarens fotball-VM, og turistdestinasjonen Puerto Vallarta skal vere blant stadane CJNG gjekk til åtak.

Island skal røyste over EU-medlemskap

Den islandske regjeringa planlegg ei folkerøysting om EU-forhandlingar i løpet av få månader, fortalde statsminister Kristrún Frostadóttir under eit pressemøte onsdag.

Ho reknar det som ei moglegheit til å integrere Island meir med EU. I dag er Island ein del av EØS, saman med Noreg og Liechtenstein.

Samstundes understreka statsministeren at det i forhandlingar med EU vil vere viktig at islendarane sin «arktiske identitet», levesett og ressursbruk vert respektert og teke omsyn til.

Den polske statsministeren Donald Tusk, som også deltok i møtet, sa at han vil vere glad for å ta imot Island i unionen, og slo fast at Polen si erfaring med EU-medlemskap har vore ei suksesshistorie. Polen vart med i 2004.

Vekas lyspunkt: India gir gratis HPV-vaksinar til jenter over heile landet

Helsedepartementet i India skal sette i gang eit landsdekkande vaksinasjonsprogram mot humant papillomavirus (HPV), retta mot 14-årige jenter. Vaksinen skal vere frivillig og gratis.

India skal bruke Gardasil-vaksinen, som beskyttar mot HPV type 16 og 18, som kan gi livmorhalskreft, så vel som type 6 og 11. Livmorhalskreft er den nest vanlegaste krefttypen blant indiske kvinner, og over 42 000 indiske kvinner døyr av det årleg.

Om lag 12 millionar jenter fyller 14 i India kvart år.

– Vaksinering før seksuell debut er kritisk, sidan HPV-infeksjonen er stille og irreversibel, og vaksinen er trygg og har bevist effekt, seier Dr. Pragya Shukla, leiar for klinisk onkologi ved kreftinstituttet i Dehli.