– Det er dumt å sitte på kvar sin haug og finne opp kruttet på nytt
Ungdomsorganisasjonar er sårbare på grunn av høg utskifting. No vert Møre og Romsdal det niande fylket i Noreg som opprettar eit barne- og ungdomsråd for å samle kreftene.
Denne artikkelen er eldre enn 1 år gamal. Det betyr at noko av informasjonen kan vere utdatert.
Victor Starheim og Elise Stokken er i full gang med å rekruttere organisasjonar. Foto: Privat.
– Ofte er problema frivillige organisasjonar møter på ganske like, og då er det dumt å sitte på kvar sin haug og finne opp kruttet på nytt, fortel Elise Stokken.
17-åringen frå Ørsta er ein av initiativtakarane til det nyleg skipa barne- og ungdomsrådet i Møre og Romsdal. Dei håpar å samle all barne- og ungdomsfrivilligheita i fylket under ein paraply.
– Då får vi ein felles plattform for problemløysing og påverknad, seier Stokken.
Les også: Unge er meir villige til å støtte klimavenleg politikk
Det niande rådet
Til no har nyskipinga på Møre samla 13 organisasjonar: Frå dei tradisjonsrike 4H og KFUK-KFUM til lokale greiner av ungdomspartia Senterungdommen, AUF, Unge Venstre og Unge Høgre.
Paraplyorganisasjonen håpar ein variasjon i medlemslag og styre vil gjere rådet sterkt og stabilt, slik at dei kan arbeide mot eit felles mål:
– Det er veldig viktig at barn og unge skal ha påverknad. Vi utgjer ein stor del av befolkninga, men det er ikkje den tilsvarande delen i folkevalde organ, seier Stokken.
Når barne- og ungdomsrådet (BUR) i Møre og Romsdal vert offisielt lansert i slutten av neste månad vert rådet det niande av sitt slag. Frå før eksisterer BUR i Akershus, Hordaland, Oslo, Troms, Vest-Agder, Vestfold, Østfold og Nord-Trøndelag.
Lokalt behov
– Eg ynskjer dei all lukke til, og dei må ikkje vere redde for å ta kontakt, seier Agnes Nærland Viljugrein.
Ho er styreleiar i UngOrg, barne- og ungdområdet for Oslo. Dei har drive på sidan 1984, og har i løpet av dei siste 35 åra rokke å tydeleg erfare verdien av ein slik fellesnemnar for frivilligheita.
– Vi får ein heilt annan legimitet, og kan fremje interessene på ein mykje breiare måte, fortel Viljugrein.
Agnes N. Viljugrein er styreleiar i UngOrg. Foto: Privat.
Ho understrekar at det er eit tydeleg behov for slike paraplyorganisasjonar lokalt. Både til å bistå med økonomisk og organisatorisk rettleiing, men også fordi barne- og ungdomsorganisasjonar har lågare ressursar, færre vaksne og høg utskifting. Difor er dei sårbare, og det er godt å ha nokon å lene seg på.
– Stå på!
Viljugrein har følgjande råd til det nyskipa BUR i Møre og Romsdal:
– Først og fremst, stå på! Sjølv om det kjem til å vere trått i starten kan de ikkje la det stanse dykk. Kjemp vidare for at born og unge skal få drive med frivilligheit, og ha høge forventingar og krav til politikarane.
Les også: – Det er så mange som vil lytte til ungdom, men som ikkje høyrer etter når ungdom snakkar
