Dette betyr statsbudsjettet for deg som er under 25 år

Gratis fastlege for 16- og 17-åringar

Regjeringa vil bruke 30 millionar kroner på å gi gratis legevakt og fastlege til 16- og 17-åringar.

Helseminister Jan Christian Vestre (Ap) seier at han vil unngå at ungdommar lèt vere å oppsøke helsehjelp på grunn av økonomi.

– Det er viktig at ungdom oppsøker lege tidleg når symptom oppstår, slik at dei raskt kan få hjelp og starte på eventuell behandling, seier han i ei pressemelding.

Kjempar mot ungdomskriminalitet

Regjeringa vil auke innsatsen mot barne- og ungdomskriminalitet. Dei aukar mellom anna studieopptaket i kriminalomsorga, og aukar kapasiteten i ungdomsfengsla.

Regjeringa vil gi 45 millionar kroner til å utvide ordninga med hurtigspor for unge lovbrytarar. Hurtigsporet inneber mellom anna at forbrytarar får raske, følbare og individuelt tilpassa straffer, og at førebyggande arbeid trer i kraft tidleg. Ti kommunar skal no tilby éin-til-éin-oppfølging av unge gjengangarkriminelle.

Ingen endringar i BSU eller frikort

Regjeringa vil halde på dagens BSU-ordning. Unge kan spare inntil 27 500 kroner i året og få skattefrådrag på 10 prosent.

Frikortgrensa for skattefri inntekt blir verande på 100 000 kroner.

Satsing på psykologi og yrkesfag

Regjeringa vil opprette nye studieplassar og satsingar på fleire norske universitet.

Universitetet i Stavanger og Universitetet i Agder skal opprette profesjonsstudium i psykologi, med 30 nye studieplassar på kvart universitet.

På NTNU vert det oppretta eit maritimt forskingssenter for kunstig intelligens, for 100 millionar kroner over fem år.

Det skal opprettast 900 nye studieplassar for fagskulestudentar i 2026, til ein prislapp på 68 millionar kroner. Regjeringa vil særleg prioritere tekniske fag, helse- og velferdsfag og område som er viktige for det grøne skiftet, i tillegg til kompetanse som er naudsynt for forsvar og sivil beredskap.

10 millionar kroner går til etablering av eit nasjonalt yrkesfagsenter i Molde. Senteret skal styrke yrkesfaga.

Mindre distriktssponsing

I fjorårets budsjettforslag innførte den dåverande Ap- og Senterparti-regjeringa ei ny ordning for å slette studiegjeld til folk som flytta til distriktskommunar.

Ordninga skulle frå 2026 innebere at alle som bur i ein av dei 189 minst sentrale kommunane i Noreg, ville få sletta studiegjelda si med 25 000 kroner i året. Ei liknande ordning finst allereie i Troms og Finnmark.

I det ferske budsjettforslaget har Ap derimot endra på gjeldssletteordninga. Dei har redusert ordninga til å gjelde færre kommunar – no 88 kommunar. Det er dei minst sentrale kommunane med størst problem med mangel på kompetent arbeidskraft som er aktuelle.

Regjeringa vil også avgrense perioden ein kan få sletta studielånet til tre år. Dei meiner ordninga vil verte meir treffsikker og i større grad rettast mot folk i etableringsfasen.

Denne endringa er blant punkta i statsbudsjettforslaget som har fått Senterpartiet til å steile.

Vil beskytte born mot ulovleg reklame

Kjempar mot desinformasjon på nett

Regjeringa vil bruke 37,5 millionar kroner på å løfte ytringsfridommen og kjempe mot desinformasjon. Dette gjer dei mellom anna gjennom Tenk – senter for kjeldemedvit, styrking av Medietilsynet og oppstart av eit forskingssenter som skal forske på det offentlege ordskiftet og følge med på ytringsfridom, polarisering og desinformasjon i Noreg.

Regjeringa vil også auke støtta til Senter for undersøkande journalistikk, Landslaget for lokalaviser og Institutt for journalistikk med 4,5 millionar kroner.