Skattelotteriet: Over halvparten av dei 100 000 som blir trekte ut, får ingenting
Regjeringa foreslår at skattelotteri-ordninga for unge skal tre i kraft frå neste år, men 6 av 10 som blir trekte ut, fell utanfor målgruppa.
Det mykje omtalte skattelotteriet som regjeringa har foreslått, skal gi skattelette til unge i arbeid for å motivera fleire til å komma inn i arbeidslivet.
100.000 unge fødde mellom 1991 og 2006 skal trekkjast ut tilfeldig.
I forslaget til statsbudsjettet for neste år legg regjeringa opp til at ordninga skal gjelda frå nyttår, men berre for dei med årsinntekt på mellom 125 000 og 345 000 kroner. For dei som tener meir enn det, blir frådraget redusert, og det fell heilt bort for dei med høgare inntekt enn 657 500 kroner.
6 av 10 fell utanfor
Maksimal skattelette får dei som tener omtrent 335 000 kroner, ifølgje finansdepartementet. Då får ein 27 500 kroner mindre å betala i skatt.
Dei anslår at 58 000 av dei 100 000 som blir trekte ut, fell utanfor ramma av ordninga. Dei har anten for låg eller høg inntekt til å kvalifisera for frådraget.
Blant dei omtrent 42 000 som får frådrag, anslår departementet at dei i snitt får eit skattelette på 12 500 kroner per person.
Sjansane for å bli trekte ut er på omtrent 8 prosent. Ein må vera registrert skattepliktig til Noreg den 31. oktober 2025.
Foreslår fem år
Regjeringa foreslår at ordninga skal vara i fem år, men opnar for å innføra eit generelt frådrag for alle unge dersom forsking viser god effekt av tiltaket.
Forskarar frå Frischsenteret og Universitetet i Oslo skal samarbeida om å forska på effekten av ordninga.
– Forsøksordninga vil medføra ein del meirarbeid for skattestyresmaktene som mellom anna skal førebu og gjennomføra trekkinga av personar som skal få arbeidsfrådraget, informera dei som blir omfatta av forsøket, og gi forskarane relevant datamateriale, skriv finansdepartementet.
Ein går ut frå at ordninga kjem til å redusera inntektene til staten med 500 millionar kroner.
