Kunnskapsministeren vil ha varsling når ein valdeleg elev startar på ny skule

Elevar som er involverte i vald og konfliktar i ungdomsskulen, kan i framtida bli strengare styrte når dei skal inn på vidaregåande skule eller når det skjer skulebyte.

– Viss ein elev har vore valdeleg, eller det er igangverande konfliktar mellom ulike grupperingar, er det viktig at skulane kan dele informasjon med kvarandre når eleven byter skule, seier kunnskapsminister Kari Nessa Nordtun (Ap) i ei pressemelding.

I dag må eleven eller foreldre gi samtykke om ein skal dele opplysningar. Det nye lovforslaget til regjeringa er ute på høyring. Kunnskapsdepartementet foreslår at skulane kan dele personopplysningar om elevar, som er nødvendig for å vareta skulemiljøet til medelevar og arbeidsmiljøet til tilsette.

Blir plassert i ulike klassar

Målet er at den nye skulen skal kunne vere betre førebudd før skulestart. Det kan til dømes dreie seg om å passe på at elevar som er i ein igangverande konflikt, blir plassert i ulike klassar.

Kunnskapsministeren vil at skulen skal vere ein stad der elevane og tilsette er trygge, at dei trivst og at dei lærer.

– Mangel på informasjon om nye elevar kan få negative konsekvensar både for skulemiljøet til medelevar og for arbeidsmiljøet til dei tilsette. Det tek vi tak i no, seier ho. Lovforslaget gjeld både skulebyte og overgangen frå ungdomsskulen til vidaregåande skule.

Nytt frå hausten

Frå hausten vil også skulen kunne gripe inn fysisk for å hindre at elevar forstyrrar undervisninga eller kjem med verbale angrep. Det vart allereie i august i fjor lov for tilsette å gripe inn fysisk overfor elevar for å hindre vald, til dømes å stoppe ein slåstkamp, eller hindre skade på ein eigedom.

– Lærarane må ha dei rette tiltaka for å sikre at ikkje nokre få øydelegg undervisninga for resten av klassen. Eg meiner derfor at vi må vurdere om læraren også skal kunne gripe inn fysisk når elevar forstyrrar undervisninga så mykje at ho ikkje kan gjennomførast, seier kunnskapsminister Nordtun.

Dei siste åra viser statistikken at det fleire stader i landet er auke i valdssaker i tilknyting til skulen.

I juni skreiv politiet i Innlandet at det har vore ein «usedvanlig» auke i ungdomssaker med kniv. Skulen er ein av stadene i nærmiljøet til barna der desse lovbrota skjer.

I Oslo opplevde skulane ein stor auke i talet på vidaregåandeelevar som vart bortviste for resten av skuleåret. Denne våren var elleve elevar bortviste.