Vekas viktigaste: Raudgrønt fleirtal, møte med Sør-Afrika og demonstrasjonar i Argentina

Trump med falske skuldingar mot presidenten i Sør-Afrika

Den sørafrikanske presidenten Cyril Ramaphosa møtte onsdag med president Donald Trump i Det kvite huset.

Ramaphosa ville i utgangspunktet diskutere handel og tollsatsane frå USA, men på møtet skulda Trump dei sørafrikanske styresmaktene for å beslaglegge eigedom og medverke i pågåande folkemord mot kvite sørafrikanarar, spesielt gardbrukarar.

Sør-Afrika har ein del valdeleg kriminalitet og drap, men kvite innbyggjarar er ikkje meir utsette enn svarte.

Donald Trump har likevel opna for flyktningar frå Sør-Afrika, basert på dei feilaktige påstandane.

I januar vedtok landet ei lov som opnar for at styresmaktene kan beslaglegge private landområde til fordel for det offentlege, mot at eigaren får betalt. Denne lova erstatta ei lov frå 1975, som vart laga under apartheid og den nye lova gjer ikkje forskjell utifrå hudfarge.

Lova har fått kritikk, særleg frå sørafrikanarar med europeiske røter. Dei meiner lova vil føre til at gardane deira vil bli mindre verdt, og at dei risikerer å bli fråtekne landområda sine med vald.

Det finst ikkje noko dokumentasjon på at dette har skjedd. Kvite sørafrikanarar utgjer 7 prosent av innbyggjarane i landet, og eig om lag 70 prosent av landområda.

Demonstrasjon for pensjon i Argentina

Onsdag vart fleire titals menneske skadd i ein demonstrasjon i Buenos Aires i Argentina, ifølgje Reuters. Aktivistar og pensjonistar vart møtt av opprørspoliti då dei demonstrerte for høgare pensjon utanfor den argentinske nasjonalforsamlinga.

Forsamlinga skulle røyste over om dei skulle vidareføre og heve støtta til pensjonistar, noko den argentinske presidenten Javier Milei har motsett seg. Argentina har hatt ein dårleg økonomi med alvorleg inflasjon, og Milei har gjennomført omfattande kutt i statleg støtte.

Kutta har ført til store protestar, og både fagforeiningar og fotballtilhengjarar har slutta seg til dei demonstrerande pensjonistane.

Nasjonalforsamlinga fekk ikkje røysta over forslaga sine, fordi berre 124 av totalt 157 representantar var til stade.

Lyspunkt: Verdas fyrste «gonoré-vaksine» i England

For fyrste gong skal det bli gjennomført vaksinering mot gonoré. England kallar inn aktuelle personar til å få vaksinen 4CMenB. Dette er ein eksisterande vaksine som blir brukt mot bakterieinfeksjonen meningokokk B, den mindre vanlege typen hjernehinnebetennelse.

Det var 85 000 gonorétilfelle i England i 2023, det høgaste talet nokosinne. Det er den nest vanlegaste kjønnssjukdommen i landet, etter klamydia.

Dei som blir kalla inn til å bli vaksinert, vil også få tilbod om vaksine mot m-koppar, HPV og hepatitt A og B.