For første gong vert det produsert meir fornybar enn fossil elektrisitet i EU-landa
Vind- og solenergi står no for 30 prosent av straumproduksjonen i EU-landa.
Det kjem fram i ein rapport frå klima-tenketanken Ember.
I første halvår av 2024 har over halvparten av straumproduksjonen i EU-landa kome frå ulike typar fornybar energi. Sol- og vindenergi har stått for 30 prosent av den totale straumproduksjonen.
Samstundes har straumproduksjonen frå fossile brensel søkke med 17 prosent samanlikna med første halvår i 2023. Dette gjer no at fornybar energi for første gong står for ein større del av straumproduksjonen i EU-landa enn fossilt brensel gjer.
Ember skriv òg at 13 av medlemslanda i EU produserer meir energi frå sol- og vindkraft enn frå kull og gass.
Utviklinga har skjedd samstundes som etterspurnaden etter elektrisitet har auka med 0,7 prosent.
– Vi er vitne til eit historisk skifte, og det skjer raskt. Viss medlemslanda i EU kan halde oppe momentet på utbygging av vind- og solkraft, så vil vi verkeleg byrje å frigjere oss frå avhengigheita av fossil energi, seier Chris Rosslowe, senioranalytikar i Ember.
Aldri før har det vorte bygd så mykje solenergi på eitt år. Foto: Zbynek Burival/Unsplash
