Vekas viktigaste: Flykapring og Epstein-høyring

Statsministeren i Storbritannia luftar nytt EU-medlemskap

Andy Burnham, statsministeren i Storbritannia, meiner landet må revurdere forholdet sitt til EU. The Guardian melder at Statsministerens kontor har begynt å lodde stemninga for ei ny folkerøysting.

I sin første tale til Labour etter at han tiltredde som statsminister, sa Burnham at langtidsplanane for forholdet mellom Storbritannia og EU ikkje er gode nok, og at landet må sjå på ulike alternativ.

– Brexit har gjort meir skade enn godt. Vi må gjenopprette eit høgt nivå av vekst og framgang for Storbritannia, sa han.

Frankrikes president Emmanuel Macron var raskt ute med å ønske Storbritannia velkomen tilbake.

I den same talen lova Burnham også å ta større statleg kontroll over vassressursane i landet, endre pensjonssystemet og endre valsystemet.

Regjeringa tillèt meir gruveavfall i Førdefjorden

Nordic Mining får eit mellombels løyve til å dumpe gruveavfall i Førdefjorden dei neste tre åra. Det kunngjorde Klima- og miljødepartementet onsdag.

Nordic Mining har tidlegare operert med eit varig utsleppsløyve. Dette løyvet vart kjent ugyldig av Høgsterett tidlegare i år.

Departementet har no suspendert dei gamle vedtaka om løyve, men gir i same vending mellombels utsleppsløyve til Nordic Mining. Det mellombelse løyvet, som tillèt utslepp på 4,5 millionar tonn gruveavfall, er vesentleg mindre enn det opphavelege, der storleiken var på inntil 170 millionar tonn. Miljødirektoratet vurderer at denne deponeringa ikkje kjem i konflikt med vassforskrifta, som var avgjerande i dommen frå Høgsterett.

Den norske miljørørsla reagerer med vantru.

– Regjeringa viser ei suveren forakt for Høgsterett, seier stortingsrepresentant Marius L. Dalin i MDG.

– Kva er det du driv med? spør Natur og Ungdom-leiar Sigrid Hoddevik Losnegård.

Manchester City er dømd for enormt pengejuks

Den engelske fotballklubben er skuldig i økonomisk juks på 11,2 milliardar kroner. Ein uavhengig kommisjon sett ned av Premier League har komme fram til at klubben har juksa med tala mellom 2009 og 2018.

Klubben skal mellom anna ha laga fiktive kontraktar med kommersielle partnarar for å kunstig blåse opp inntektene og redusere kostnadene til klubben. Dei skal også ha levert falske rekneskapar og skjult den faktiske situasjonen for revisorar og fotballstyresmakter. Representantar for klubben skal også ha loge under høyringa.

Sjølv nektar klubben for alle punkta.

Manchester City risikerer å bli straffa med bøter, poengtrekk eller utestenging frå Premier League.

Lyspunkt: India investerer 19 milliardar dollar i fornybar energi

Den indiske regjeringa skal investere 1,36 billionar rupi i fornybar energi. Programmet skal styrke straumnettet og auke lagringskapasiteten i landet.

Målet er å nå Indias mål om ein fornybar energikapasitet på 900 GW innan 2035. I dag er kapasiteten på 300 GW. Til samanlikning har Norsk vasskraft totalt ein kapasitet på 34 GW.

Indias kraftbehov har firedobla seg på 20 år, og forbruket deira består 76 prosent av kolkraft. Luftureining bidreg til store helseutfordringar i landet.