Vekas viktigaste: Separatistar, aksjehandel og studenthelse

Inhabilitetsskuldingar mot Solberg etter mannens aksjehandel

Ektemannen til tidlegare statsminister Erna Solberg, Sindre Finnes, tente 1,8 millionar kroner på aksjehandel medan kona var statsminister. Den siste veka har Høgre kome med ei tidslinje over når partiet og Erna vart informert om dei forskjellige aksjekjøpa.

Sidan dei er gift, og difor har felles økonomi, kan denne aksjehandelen ha gjort Solberg inhabil som statsminister i fleire saker. Ho seier sjølv at ho ikkje var klar over omfanget til Finnes sin aksjehandel, og at han har halde mykje skjult. Advokaten til Finnes har sagt at dei ønsker at Økokrim etterforskar saka.

Saka har gjort at fleire stiller spørsmål ved om Erna Solberg kan stille som Høgre sin statsministerkandidat i 2025. Solberg har til no sagt at det er opp til partiet, ikkje henne, kva dei vel å gjere vidare.

(Bilete frå Høgres landsmøte 2023. Foto: Hans Kristian Thorbjørnsen)

Storbritannia trekker tilbake klimatiltak

Onsdag forsikra den britiske statsministeren Rishi Sunak om at Storbitannia held fast ved målet om å ha netto nullutslepp innan 2050, men at fleire verkemiddel blir utsett.

Sunak stadfestar blant anna at forbodet mot nye bensin- og dieselbilar blir utsett frå 2030 til 2035, utfasinga av gass- og oljefyring i bustader blir forseinka, og dei held fram med å leite etter olje og gass i Nordsjøen.

Grunnen statsministeren gir er at dei ikkje må gå for fort fram med klimatiltak, elles vil folk vende seg bort, og dei vil ikkje samtykke til tiltaka.

Fleire kritiserer statsministeren for dette, inkludert Greenpeace, Ed Miliband frå det britiske arbeidarpartiet, og den tidlegare statsministeren Boris Johnson som la fram fleire av tiltaka i sin regjeringsperiode.

(Foto: Simon Walker / No 10 Downing Street)

Ein tredjedel av studentar kan ha ei psykisk liding

I ei tilleggsundersøking til Studentenes helse- og trivselsundersøking (ShoT), kjem det fram at 33,9 prosent av studentar oppfyller dei formelle krava til ei psykisk liding.

Desse tala tek utgangspunkt i dei siste 30 dagane. Dersom ein tek utgangspunkt i det siste året er talet endå høgare, med 57,3 prosent av dei kvinnelege og 42,5 prosent av dei mannlege studentane som oppfyller dei formelle krava til ei psykisk liding.

Alvorleg depressiv episode og generalisert angstliding er dei vanlegaste diagnosane.

Forskings- og høgare utdanningsminister Sandra Borch seier tala gir grunn til bekymring:

– Undersøkinga gir eit bilete av ei alvorleg folkehelseutfordring, som vi må handtere i fellesskap. Når så mange unge menneske rapporterer at dei slit med ulike psykiske plager, må vi som samfunn ta det på stort alvor, seier ho.

(Christian Erfurt via Unsplash)

Diplomatisk krise mellom India og Canada

Den canadiske statsministeren Justin Trudeau har skulda India for å ha drepe den canadiske statsborgaren Hardeep Singh Nijjar for to månader sidan, utanfor eit sikh-tempel i Canada.

India nektar for skuldingane.

Nijar var ein separatist som kjempa for at sikhane, ein religiøs minoritet i India, skulle bryte ut som ein eigen republikk i regionen Punjab. Dei indiske styresmaktene har stempla han som ein terrorist.

Etter Nijar døydde, utviste Canada ein indisk diplomat. Som motsvar utviste India ein canadisk diplomat. Forholdet mellom dei to landa er no uroleg.

(Foto: Sean Kilpatrick/The Canadian Press via AP, File)

✨Lyspunkt✨: 70-åringar i dag er like kjappe i hovudet som 60-åringar var før

Tromsøundersøkelsen vart starta i 1974, og kartlegg helsa til folk i Tromsø. Rundt 45 000 innbyggjarar har delteke til no.

Nye resultat viser at i tillegg til betre fysisk helse, står det også betre til med dei kognitive evnene til folk. Ved å samanlikne tal frå 2001, 2008 og 2015/2016, viser det seg at dei som er født seinare konsekvent gjer det betre. 70-åringar i 2016 gjorde det til dømes like bra som 60-åringar i 2001.

Meir utdanning, fysisk aktivitet og mindre røyking er nokre av faktorane forskarane peiker på for betre resultat.

(Foto: Jack Finnigan via Unsplash)