Tre av fire vidaregåandeelevar valde å annullere norskeksamen
Tre av fire elevar valde å annullere skriftleg eksamen i norsk hovudmål for studieførebuande i vidaregåande skule.
Årsaka var innloggingsproblem på eksamen 22. mai i år, ifølgje Utdanningsdirektoratet.
Då vart det opna for at alle elevar i vidaregåande skule som vart ramma av dette, kunne få høve til å annullere eksamen og få dispensasjon frå kravet til talet på eksamenar på vitnemålet.
Annullering auka snittet
32 500 elevar skulle ta eksamen, men ifølgje Utdanningsdirektoratets oversikt var det berre 9054 som fekk karakter i faget.
Karaktersnittet i norsk hovudmål var på 3,6 i skuleåret 2022/2023, men tek ein omsyn til annulleringane stig snittet til 4,2.
Andelen elevar som har fått karakteren 5 eller 6 er over 40 prosent, som er over dobbelt så stor del som for tilsvarande eksamen i 2018/2019.
Jentetrend held fram
Samtidig held trenden fram med at jenter får betre karakterar enn gutar i dei aller fleste faga.
Gutar har betre karakterar enn jenter i kroppsøving i andre og tredje klasse og to matematikkfag for yrkesfag. I desse fire faga ligg snittet til gutane 0,2 over jentene sitt.
Covid-19 førte til nedstenging av skulane, og derfor har dei fleste elevane i vidaregåande skule hatt få eksamenar og ein del heimeundervisning dei siste åra. Foto: Heiko Junge / NTB / NPK
I fellesfaget samfunnskunnskap, som har flest elevar, har jentene gjennomsnittskarakteren 4,5 og gutar 4. I dei fleste av dei store fellesfaga er forskjellen mellom snittet til gutane og jentene mindre enn dette, men det er berre i historie vg3 påbygg at gutane og jentene har same snitt med 4,1.
Første post-covid eksamen
Det er første eksamen på fire år at alle eksamenar vart haldne for elevar i vidaregåande skule.
På grunn av koronapandemien har undervisningssituasjonen vore ekstraordinær med ein del heimeundervisning og fleire eksamenar har vorte avlyst.
Det er også innført nye læreplanar med ny struktur og endra kompetansemål.
Kollasj av Framtida med eksamenslokale på Åssiden Videregående skole før eksamen i norsk blir gjennomført og Noa Størksen Strandhagen (18). Foto: Frederik Ringnes / NTB, privat
