Ungdomsorganisasjonar krev like læringsvilkår for nynorskelevar
Fleire ungdomsorganisasjonar krev at Stortinget sikrar nynorskrettane ved at læringsressursar laga for bruk i skulen har nynorskkrav.
Denne artikkelen er eldre enn 1 år gamal. Det betyr at noko av informasjonen kan vere utdatert.
Tobias Christensen Eikeland er leiar i Norsk målungdom. Foto: Kristianne Marøy.
– I eit samfunn som er dominert av bokmål, er det mange nynorskelevar som opplever eit sterkt press mot språket sitt. Kvart år skiftar elevar i hopetal frå nynorsk til bokmål, særleg i overgangen frå ungdomsskule til vidaregåande skule.
Det seier Tobias Christensen Eikeland, leiar i Norsk Målungdom.
– Vi fryktar at denne tendensen vil bli forsterka dersom Stortinget ikkje sikrar nynorskrettane.
Dei har no gått saman med AUF, Sosialistisk Ungdom, Unge Venstre, Unge Sentrum, Elevorganisasjonen og Pedagogstudentene i Utdanningsforbundet om eit nytt opprop.
Her ber dei Stortinget leggje læringsressursar som er laga for bruk i opplæringa inn under parallellitetskravet om bokmåls- og nynorskversjon.
– Berre slik kan nynorskelevane få ein skulekvardag på språket sitt, skriv dei i oppropet.
Leiar i Noregs Mållag Peder Lofnes Hauge. Foto: Jannica Luoto
