Unge Høgre vil senke den kriminelle lågalderen til 13 år
Ungdomspartiet vil setje ned den kriminelle lågalderen for barn som gjer alvorleg kriminalitet. – Løysinga er ikkje å fengsle barn, svarar AUF.
Denne artikkelen er eldre enn 1 år gamal. Det betyr at noko av informasjonen kan vere utdatert.
– Vi veit at det er mange barn som veks opp i utanforskap, og som hamnar i feil miljø og som gjer alvorleg kriminalitet. Problemet er at barna er under 15 år, sa Tonje Nilsen frå Unge Høgre.
Sentralstyremedlemmen deltok i torsdagens Politisk kvarter, der ho tok til orde for å setje ned den kriminelle lågalderen til 13 år for barn som gjer alvorleg kriminalitet. I dag er den kriminelle lågalderen i Noreg 15 år:
– Det tyder at politiet har lite dei kan gjere, anna enn å sende bekymringsmelding til barnevernet. Det fører til at det er veldig mange barn som ikkje vert fanga opp eller følgt opp av nokon, og held fram å gjere kriminalitet og vere i kriminelle miljø, sa Nilsen vidare.
Lågare kriminell lågalder vil gje politiet fleire verkemiddel til å hjelpe, argumenterer Nilsen.
Fleire barn gjer valdskriminalitet
SSB-tal publisert i september i år, syner at det var færre sikta i 2021 enn tidlegare år – unnateke blant dei aller yngste. Desse er ikkje strafferettsleg ansvarlege, men vert likevel registrerte.
Dei siste åra har det vore ei klar trend med auka tal sikta i aldergruppa 5-14 år, som i hovudsak er 13- og 14-åringar.
Særleg markant er endringa i lovbrotsgruppa vald og mishandling. 1103 barn er registrert med i alt 1531 siktingar for vald og mishandling.
Samla sett er det 12 prosent fleire sikta i denne aldergruppa for vald og mishandling, samanlikna med 2020. Det er nær ei dobling sidan 2014.
AUF: – Rette løysinga er ikkje å fengsle barn
Nestleiar i AUF, Gaute Børstad Skjervø, meiner senka kriminell lågalder vil vere ei uklok retning å ta Noreg i.
– Eg trur ikkje den rette løysinga på 13-åringar som finn fellesskap i gjengar er å fengsle barn, seier han i Politisk kvarter.
Gaute Børstad Skjervø, nestleiar i AUF. Pressefoto AUF
Tonje Nilsen peikar på at endå lågare kriminlell lågalder kan føre til at ein 13-åring hamnar i fengsel, så vert barn handsama annleis enn vaksne i kriminalomsorga.
Skjervø meiner førebygginga har svikta, og at skule og helsevesenet må på bana.
– Det er meir alvorleg kriminalitet, og vi ser at yngre barn blir dregne inn i det. Men om ein 13-åring tenker at sitt naturlege fellesskap er i ein kriminell gjeng eller ekstremistisk organisasjon, så er det ikkje først og fremst 13-åringen som har feila, men storsamfunnet rundt.
Turkameratane Morten Sandvik (t.v.) og Emil Pettersen utfordrar ofte Safari Shabani til å gjere ting han ikkje vil. Foto: Mikkel Graham Guttormsen (Lucky View)
