Klimatoppmøtet etablerer fond for tap og skade: – Endeleg

Etter to veker med harde diskusjonar på klimatoppmøtet i Egypt, vart delegasjonane  samde om ei avtale søndag morgon.

Spire og Changemaker er skuffa over svakt språk på 1,5-gradersmålet og at det ikkje vart noko skjerping i språket om å fase ut fossile energikjelder.

Men organisasjonane jublar likevel over ein etterlengta siger: Det vart semje om å etablere eit fond for tap og skade.

Thea Birgitte Erfjord er koordinator for klima- og naturutvalet i Spire. Foto: Spire

– Tap og skade har vore ei kampsak for land i det globale sør i 30 år, og handlar til sist om klimarettferd. Til no har offera sjølv betalt mykje av prisen for klimaendringane, sjølv om dei har minst skuld i dei, seier Thea Birgitte Erfjord frå Spire i ei pressemelding.

• Les også: Støre lovar at Noreg vil levere for å nå klimamåla

Tydelege politiske signal

Klimakatastrofer som flaumen i Pakistan og tørken i store deler av Afrika, har retta verda si merksemd mot følgjene av klimaendringar.

– Endeleg har finansiering til tap og skade fått merksemd på klimaforhandlingane som står meir i stil med kor alvorleg krisa er, seier Changemaker-leiar Naja Amanda Lynge Møretrø i pressemeldinga. Ho held fram:

– Det er tydelege politiske signal ut frå COP27 om at behova for å handtere tap og skade er enorme, og at verda no i større grad vil gjere ein samla og koordinert innsats for å handtere klimaøydeleggingar.

Leiar i Changemaker Naja Amanda Lynge Møretrø. Foto: Changemaker

• Usikker på nokre av omgrepa? Sjekk ut ordlista! 

Framleis spørsmål utan svar

Sjølv om opprettinga av fondet no er vedteke, så er ikkje kampen over. Framleis står viktige spørsmål utan svar, som: kven har mest ansvar for å betale for øydeleggingane som skjer i utviklingsland? Dette kjem til å verte diskutert på framtidige klimatoppmøte.

– Vi er avhengige av at alle land gjer meir for å nå 1,5-gradersmålet, alt anna vil ha enorme konsekvensar og resultere i meir tap og skade. Samstundes vekkjer det mistillit hos land i sør at rike land verken har levert på lovnader om utsleppskutt eller klimafinansiering, og samstundes ber utviklingsland gjere meir, seier Erfjord og held fram:

– Dette viser kor viktig det er for klimasamarbeidet at alle, og særleg rike land faktisk gjer alvor ut av det ein lovar.

• Les også: COP27: – Frittalande, sjølvstendige, kritiske røyster har stort sett vorte stilna

Kollasj: Framtida.no.