Forskarar har lært gullfiskar å køyra bil
Denne artikkelen er eldre enn 1 år gamal. Det betyr at noko av informasjonen kan vere utdatert.
Denne saka stod først publisert hjå Framtida Junior. Der kan du òg lese om Mali (15) som er lei av at jenter vert dømde annleis enn gutane på fotballbana!
– Slik som alle som har lært seg å sykla eller å køyra bil veit, var det utfordrande i byrjinga, seier Shachar Givon i ei pressemelding.
Ho er ein av forskarane som står bak studien med gullfisk som sjåførar. Saman med fleire andre forskarar ved Ben-Gurion University of the Negev i Israel, ville ho finna ut om gullfisk hadde evna til å finna vegen, sjølv under noko me kan kalla svært uvanlege tilhøve.
«Fiskebilen» har no fått ny tyding. Foto: Ben-Gurion University of the Negev
Og jammen skulle det visa seg at gullfiskane hadde full kontroll – sjølv på tørt land.
Saka er omtalt av fleire internasjonale medium, deriblant News for Kids.
Nytta eit heilt spesielt system
For å sjekka om gullfisken greidde å finna vegen, utvikla forskarane ein spesiell robotbil som dei har gitt namnet «Fish Operated Vehicle / FOV». Denne kunne gullfisken køyra framover, bakover og frå side til side.
Ein gullfisk vart plassert inne i ein vasstank om bord på FOV-en. Ved å nytta eit heilt spesielt system, kunne forskarane sjå kva veg gullfisken sumde inne i tanken, og FOV-en køyrte slik i den same retningen som gullfisken.
Men kva skulle gullfisken faktisk finna fram til? Jo – eit rosa teikn inne i eit lite rom.
Det rosa merket på veggen var målet til gullfisken. Foto: Ben-Gurion University of the Negev
Viste stor framgang
FOV-en med gullfisken vart plassert inne i rommet der forsøket vart registrert. I starten tok det opp mot ein halv time før gullfisken greidde å finna fram til det rosa teiknet. Men etter litt øving, hadde fisken greidd det på under eit minutt!
Då han hadde greidd å finna fram, fekk han mat som belønning.
Eksperimentet viste forskarane at gullfiskar greier å finna fram til eit mål. I tillegg greidde dei å unngå å bli lurt av andre fargar enn rosa i det vesle rommet. Dei greidde også å frigjera «robot-bilen» då han stod fast inntil ein vegg.
Her kan du sjå ein video om eksperimentet:
