Meiner studentane er gløymde i statsbudsjettet
Denne artikkelen er eldre enn 1 år gamal. Det betyr at noko av informasjonen kan vere utdatert.
– Solberg-regjeringa har sagt at dei skal satse på kunnskap, men dei har gløymt dei viktigaste i høgare utdanning, nemleg oss studentar.
Det seier Tuva Todnem Lund, leiar i Norsk Studentorganisasjon (NSO) i ei pressemelding.
I statsbudsjettforslaget er studiestøtta justert for prisvekst, men ikkje ytterlegare auka.
NSO-leiaren ber den komande regjeringa satse på studentar og forplikte seg til å trappe opp studiestøtta til minst 1,5G, noko som tilsvarar ein auke på rett over 33.000 kroner til kring 160.000 kroner i året.
Arbeidande studentar
NSO-leiar Todnem Lund peikar på at 7 av 10 studentar i dag arbeider ved sidan av studia.
Ifølgje ein rapport frå Eurostudent, òg omtalt av Khrono, seier 65 prosent av norske studentar at inntektene frå deltidsjobben er nødvendige for å kunne studere i det heile teke. Rapporten slår fast at å jobbe mykje går utover studia.
– Auka studiestøtte og ein betre studentøkonomi gjev studentane mogelegheita til å prioritere studia, seier Todnem Lund.
NSO forventar no at Jonas Gahr Støre (Ap) si påtroppande regjering og det nye stortinget tek ansvar og aukar kjøpekrafta til studentar ved å heve studiestøtta.
– Vi må sjå ein reell auke allereie i år for å vise at studentane vert tekne på alvor, avsluttar Todnem Lund.
- Les også kva Elevorganisasjonen meiner om statsbudsjett-forslaget: – Møkk lei av å vente på at skulen skal verte gratis
Edvard Botterli Udnæs er leiar i Elevorganisasjonen. Foto: EO
