Veljarane i Washington krev seksualundervising i offentlege skular
For første gong i USA har eit krav om seksualundervising i offentlege skular blitt stemt fram av veljarane i ein amerikansk stat.
Denne artikkelen er eldre enn 1 år gamal. Det betyr at noko av informasjonen kan vere utdatert.
På valdagen 3. november hadde dei i staten Washington også ei folkeavstemming om seksualundervising. Tiltaket fekk fleirtal og vil tre i kraft allereie dette skulehalvåret.
Det melder nyheitsbyrået Associated Press.
Første gong folket har stemt over seksualundervising
Referendum 90 var den einaste folkeavstemminga i staten utanom presidentvalet i år.
I minst 29 statar, pluss Washington D.C., er det krav om at offentlege skular skal ha seksualundervising, men det har aldri vore bestemt gjennom avstemming i staten Washington før. I staden har pensum blitt diskutert i skulestyre og statshus.
Det er dimed den første seksualundervisingskampen som er bestemt gjennom folkeavstemming i USA.
Ei av dei som jubla over vedtaket er Courtney Normand, som leiar ei politisk gruppe tilknytt Planned Parenthood.
– Me er så takknemlege overfor veljarane for denne sterke sigeren, som verkeleg visar folk si djupe støtte for at unge får korrekt og inkluderande seksualundervisning, seier ho til Associated Press.
- Les også: Fem grunnar til å elske Sex Education
Omkamp frå republikanarane
Vedtaket kjem etter ein heit debatt frå tidlegare i år.
Demokratane i staten trudde dei hadde fått gjennom ei lovendring for eit rutinemessig krav om seksualundervising i offentlege skular, men ei gruppe republikanarar og konservative kristne gjekk til motkamp og freista å omgjere vedtaket ved folkeavstemming ved årets val.
I ein kampanje mot vedtaket samla gruppa Parents for Safe Schools inn 264.000 underskrifter. Det er rekord i talet på samla underskrifter for å få omgjort eit vedtak gjennom folkeavstemming, dei siste fire tiåra. To tredjedelar av underskriftene kom frå kyrkjer.
Progressivt pensum
Demokratane ville innføre vedtaket for å verna unge frå seksuelle overgrep, sjukdommar og infeksjonar.
Gjennom lova vil barnehagebarn lære om å handtere kjensler og korleis ein får vener, medan eldre barn vil lære om samtykke og korleis ein responderer på vald. Pensum må også ta opp problem som LHBTQ-studentar møter. Dette gjer pensum til eit av dei mest progressive i landet.
- Les også: 12 viktige resultat etter USA-valet
Kollasj av framtida.no: Bakgrunn: Luke Michael/Unsplash. F.v. Mauree Turner, Sarah McBride og Madison Cawthorn. Foto: presse.
