New Zealand vil gi ut gratis mensenprodukt på skulen
Denne artikkelen er eldre enn 1 år gamal. Det betyr at noko av informasjonen kan vere utdatert.
Onsdag 4. juni vart det klart at styresmaktene i New Zealand vil gi ut gratis mensenprodukt til skular over heile landet.
Målet er å kjempe mot mensen-fattigdom: at jenter og kvinner ikkje har råd til å kjøpe nok sanitærprodukt til mensen.
95.000 blir heime frå skulen
– Me reknar at omlag 95.000 jenter i alderen 8-18 år blir heime frå skulen under mensen fordi dei ikkje har råd til bind og tampongar, fortalde statsminister Jacinda Ardern i ei pressemelding.
Ved å gje det ut gratis, håpar dei å få desse unge tilbake på skulebenken.
Styresmaktene investerer 2,6 millionar newzealandske dollar, omlag 16 millionar norske kroner, i initiativet.
Det vil først bli rulla ut på 15 skular i Waikato-regionen nord i landet, 20. juli, og så til heile landet i løpet av 2021.
Ikkje først ute
New Zealand er ikkje åleine om å ta grep for å nedkjempe mensenfattigdom. I januar lanserte utdanningsdepartementet i England eit program som skal sikre tilgangen på mensenprodukt i alle skulane i landet.
I februar vart Skottland det første landet i verda som gjekk inn for å sikra gratis tilgang til mensenprodukt for alle, gjennom the Period Products (Free Provision) Scotland Bill.
Illustrasjonsfoto: Ibrahim Rifath og Michael Longmire/Unsplash. Kollasj: Framtida.no
