Den nye LNU-leiaren: – Det viktigaste ein kan gjere for å forme samfunnet, er å organisere seg

– Eg trur det viktigaste ein kan gjere for å forme samfunnet vårt, er å organisere seg – og LNU styrker mogelegheita for barn og unge til å gjere nettopp det, fortel Isa Maline A. Isene på e-post til Framtida.no.

27-åringen er eigentleg utdanna museolog, men frå juni av tek ho til som ny leiar for Landsrådet for Norges barne- og ungdomsorganisasjoner (LNU).

LNU er ein paraplyorganisasjon for 98 norske barne- og ungdomsorganisasjonar. Dei jobbar for å fremje saker knytt til ungdomsfrivilligheit politisk, samt å heve kompetansen deira og forvalte ulike støtteordningar.

Fram til den nye arbeidskvardagen tek til, arbeider ho heimanfrå som så mange andre.

– Det vert mykje kaffi og skjerm. Men katten min er glad for at eg er mykje heime, fortel Isene.

• Det er høgsesong for leiarbyte i ungdomsorganisasjonane! Her får du med deg dei som tek til i nye verv

Vil avgrense koronakonsekvensane

Isa Maline Isene vart vald til ny leiar av organisasjonen førre veke, då historias første digitale Barne- og ungdomsting vart avhalde. Men den øvrige sakslista var usedvanleg kort.

– Vi hadde eigentleg tenkt å ta opp viktige saker som arbeidsprogram, kor vi skulle bestemme kva LNU skal jobbe med dei neste to åra. Dessverre måtte vi utsetje det, men vi fekk i alle fall nytt styre! forklarar 27-åringen.

Det er likevel klart at ein av dei viktigaste sakene i år vert å avgrense konsekvensane av pandemien:

– Akkurat no er det å sørgje for at den unge frivilligheita ikkje lir store økonomiske tap på grunn av koronakrisa.

Men Isene fortel også at LNU vil bruke tid på å vise kor mykje verd ung frivilligheit er, og følgje opp politiske vedtak knytt til tilgang til lokale.

– I tillegg kjem vi til å jobbe med 16-årig stemmerett, basert på kva som vert resultatet av vallovutvalet si tilråding som kjem i midten av mai, fortel den nyvalde leiaren.

Vallovutvalet vart sett ned i 2017, og fekk då i oppgåve å granske korleis norske val vert gjennomførte. Utvalet skal lage eit forslag til ny vallov og vurdere kor vidt ein skal endre valordninga. Dei har frist til 31. mai i år.

• Les også: I Austerrike, Brasil og Ecuador får 16-åringar stemme – i Noreg vert ein ikkje samde

Engasjerte seg for klimaet

27-åringen frå Oslo fortel at ho alltid har vore engasjert, men at det var uroa for klimakrisa som førte til at ho vart aktiv i ein organisasjon. Isene har tidlegare vore generalsekretær i Grøn Ungdom, og hatt ulike verv både der og hjå moderpartiet.

– Det har også ført meg vidare til LNU, fordi eg trur at det å organisere seg er den viktigaste måten å løyse store, globale utfordringar på.

No når ho vert LNU-leiar er det særleg to saker Isene har lyst til å prioritere:

– For det første, så har eg lyst til å jobbe med forteljinga om den unge frivilligheita. Eg vil jobbe med å synleggjere verdien av det vi driv med, og korleis det er til nytte for samfunnet, men også har ein eigenverdi i seg sjølv, forklarar ho.

– For det andre, så er det viktig for meg at LNU er tydelege i retninga om at å møte medlemsorganisasjonane sine behov, vert verande prioritet nummer éin.

 

View this post on Instagram

 

Hurramegrundt! Jeg har blitt valgt som leder i @lnufoto ?? Tusen takk for tilliten, Barne- og ungdomstinget! Som jeg gleder meg til å løfte den unge frivilligheten sammen med dere de neste to årene ?

A post shared by Isa Maline Isene (@isa.maline) on Apr 23, 2020 at 5:32am PDT

• Les også: Ungdomspartia vil evakuere borna frå Morialeiren: – Nestekjærleiken stoppar ikkje ved svenskegrensa

Unge veit kva som er lurt

Isa Maline Isene er ikkje i tvil om at det framleis er bruk for ein organisasjon som LNU, som har som mål at barn og unge skal kunne engasjere seg i frivillige og demokratiske fellesskap, og ha innverknad på samfunnet rundt seg.

– Korleis kan ein sikra at meiningane  og problema til ungdom når fram til dei som styrer?

– Dette er jo kjernen i det vi driv med i LNU – nettopp at barn og unge skal verte tekne på alvor, slår Isene fast og held fram:

– Mykje handlar om å ha tillit til at vi sjølv veit kva som er lurt – for oss, og for samfunnet elles. Og så må jo rammevilkåra vere på plass for at det skal vere mogeleg å engasjere seg, det vere seg lokale, frie midlar eller strukturar som involverer barn og unge i avgjersleprosessar.

– Kva er dine personlege hjartesaker?

– Eg er oppteken av demokrati og at så mange som mogeleg skal kjenne til og bruke sitt demokratiske handlingsrom. Det trur eg er nødvendig i møte med dei store utfordringane vi står overfor.

– Kva er idealsamfunnet?

– Eit samfunn kor så mange som mogeleg er engasjerte i samfunnet rundt seg!

• Les også: 1200 registrerte streikar i Noreg under #digitalskolestreik: – Ikkje la unntaktstilstand bli vår normaltilstand

Skjermdumpar frå Instagram med #digitalskolestreik 24. april 2020. I midten Maja Danielsen Rørvik (18 år), oppe vil venstre: Even Jacobsen (14), til høgre: Markus Frislid (21), nede til venstre: Flora Næss (14) og til høgre: Solveig Skaugvoll Foss (23).