NSO sin nye leiar: – Det er viktig at samfunnet vert meir opptekne av at unge skal høyrast

– Det å vete at eg kan bidra til at vi kan få eit betre samfunn er utruleg gjevande, skriv Marte Øien i ein e-post til Framtida.no.

28-åringen frå Ålesund tok nyleg fatt på vervet som leiar i Norsk studentorganisasjon. Det er nettopp mogelegheita til å skape endringar for norske studentar som har engasjert og motivert Øien mest.

Ho trur likevel ikkje NSO kjem til å merke stor forskjell når ho no har teke over roret. Organisasjonen skal nemleg vere stabil uavhengig av leiing, og politikken for å betre studentane sin kvardag skal vere i fokus.

Ei sterk norsk studentstemme

– Kvifor er det bruk for Norsk studentorganisasjon i Noreg?

– Studentane er den viktigaste delen av norsk høgare utdanning. Då er det viktig for utviklinga av akademia og for utviklinga av samfunnet i sin heilskap at det eksisterer ei sterk norsk studentstemme i den offentlege debatten.

– Når stortinget, regjeringa og norske utdanningsinstitusjonar eller andre aktørar skal vedta eller meine noko om høgare utdanning er det nødvendig at studentane vert høyrde, og får ta del i debattane.

– Kva var dei viktigaste vedtaka som vart gjort på landsmøtet dykkar?

– Dei viktigaste vedtaka som vart gjort på landsmøtet i år er at organisasjonen fortsatt skal vere ei studentstemme som skal kjempe for gratisprinsippet i høgare utdanning, at studentar skal prioriterast økonomisk i samband med statsbudsjettet og endringar i universitets- og høgskulelova skal vere til beste for norske studentar.

• Har du fått med deg denne? Tal frå utdanningsinstitusjonane viser: Ja, det løner seg å klage på karakterane!

Eit år med mykje på tapetet

– Kva er dei viktigaste sakene for NSO det neste året? 

– For studentane vert den viktigaste saka statsbudsjettet. At studentane får gjennomslag for sine krav om å auke studiestøtta til 1,5 gongar grunnbeløpet i folketrygda, at studiestøtta vert utbetalt over elleve månadar, reversere fjorårets stipendkutt og at det vert bygd minst 3000 studentbustadar.

I tillegg trekker Øien fram ekspertutvalet som arbeider med å revidere universitets- og høgskulelova. Denne skal leggast fram i februar 2020. I løpet av same året kjem også to stortingsmeldingar som NSO skal arbeide mykje med.

– Korleis kan ein sikra at meiningane og problema til ungdom når fram til dei som styrer?

– Den viktigaste måten å sikre at meiningane og utfordringane til ungdom kjem fram til dei som styrer er at ungdom engasjerer seg i demokratiet.

I år er det rekordmange unge som står på liste til norske kommune- og bystyreval. Øien oppmodar likevel endå fleire unge til å stille til val:

– Det er viktig at partia og samfunnet vert meir opptekne av at unge skal høyrast, og difor er det sjølvsagt også viktig at unge deltek i samfunnsdebatten, og ikkje minst brukar stemmeretten sin.

• Les også: I fjorårets statsbudsjett la regjeringa fram forslag om å omgjere lån til stipend først etter fullført grad. Det fekk NSO til å reagere. 

Auka studiestøtte og betre læringsmiljø

– Kva er dine personlege hjartesaker?

– Mine to personlege hjartesaker er auka studiestøtte og betre læringsmiljø.

– Når det gjeld studiestøtta er dei viktigaste faktorane at studentar skal kunne studere mest mogeleg på heiltid og at alle skal ha reell lik rett til utdanning i Noreg. Når det gjeld læringsmiljø er det viktig at norske studentar får dei same rettane som norske elevar og arbeidstakarar har gjennom lovverket.

– Kva er idealsamfunnet?

– Idealsamfunnet må vere når vi alle får mogelegheita til å delta uavhengig av kva føresetnadar vi har. Oppnår vi det, så trur eg kunnskapssamfunnet vårt vert rikare.

• Les også intervjuet med den nye leiaren i Elevorganisasjonen: – Skulen er ikkje eit venterom for vaksenlivet

Alida de Lange D’Agostino skal sørge for at rettane til norske elevar vert ivaretekne i året som kjem. Foto: Agathe Waage/Elevorganisasjonen