Bygdepride fekk likestillingspris
– Homofili smittar ikkje. Men Bygdepride gjer det, sa leiar Anbjørn Steinholm Frislid då han tok imot prisen.
Denne artikkelen er eldre enn 1 år gamal. Det betyr at noko av informasjonen kan vere utdatert.
Denne veka mottok Bygdepride likestillingsprisen for 2018 frå Møre og Romsdal fylkeskommune.
Etter utdelinga delte Ørsta/Volda Pride dette innlegget på sine eigne Facebook-sider:
Bygdepride fekk likestillingsprisen for landets første Bygdepride, som vart arrangert i Ørsta/Volda 11. mai i år.
I forkant av arrangementet skipa pastor Hans Reite og ei lita gruppe ein Jesus-marsj, for å markera sin motstand.
Oppmøtet på Jesus-marsjen 28.april var likevel ikkje i nærleiken av dei over 2000 deltakarane som møtte opp på Noregs første Bygdepride.
Les også: – Heia kjærleiken! Heia Bygdepride!
Les også: Presenterer skeiv nynorsk-historie på Bygdepride
Smittsam bygdepride
Ein av initiativtakarane og leiar i Bygdepride, Anbjørn Steinholm Frislid, tok imot prisen på 15.000 kroner og eit kunstverk i Geiranger måndag 15. oktober.
– Homofili smittar ikkje. Men Bygdepride gjer det. Det er utruleg motiverande å oppleve at det i løpet av det siste halve året har kome tilsvarande arrangement andre stader i landet, som på Jæren, på Stord, i Brumunddal, og ikkje minst i Ålesund. No er vi i gang med eit nytt Bygdepride. Det skal igjen verte ei fin markering i ei positiv ramme om at det er heilt ok å vere skeiv på bygda, sa han ifølgje avisa Møre-Nytt.
Prisen blir delt ut til ein person eller instans som har utmerka seg positivt i arbeidet med å fremje likestilling i arbeid for frie val og like moglegheiter.
Les også: Tara (16) i spissen for fleire tusen i Storapride
– Har stått opp mot farlege haldningar
Leiar i kultur og folkehelseutvalet, Marit Nerås Krogsæter, understreka at årets prisvinnar har sett spor lokalt, regionalt og nasjonalt.
– Det er ein organisasjon som har evna å inkludere og foreine, og ikkje minst, stått imot meiningar som går på tvers av likestillingstankane våre. For å sitere ein av dei som nominerte organisasjonen: «Dei har stått opp mot farlege haldningar og meiningar i lokalsamfunnet. Dei har stått for eit flott arrangement for å inkludere og vise positive haldningar mot dei som kan føle seg utanfor på grunn av legning», sa Nerås Krogsæter ifølgje Møre-Nytt.
