Vekas viktigaste: Besøk frå USA og Ukraina og Nordisk råds pris

Forhandling mellom Russland og Ukraina

Denne veka møtte den ukrainske presidenten Volodymyr Zelenskyj amerikanske Steve Witkoff i Oslo, skriv NRK. Witkoff har fått ansvar frå president Donald Trump for å hjelpe med fredsmeklinga mellom Ukraina og Russland.

Statsminister Jonas Gahr Støre og den finske presidenten Alexander Stubb var også til stades under møtet i Oslo.

Witkoff møtte også den russiske presidenten Vladimir Putin i St. Petersburg for å orientere om kva som vart diskutert på møtet i Oslo.

Støre omtalar det som eit viktig steg i rett retning, og at russarane ser etter fleire moglegheiter for diplomati.

Valdelege opptøyar i Frankrike

Det er no ulovleg å demonstrere i fleire delar av Paris, ifølgje NTB. Styresmaktene har også innført portforbod fleire stader i hovudstaden og i andre byar i Frankrike.

Det skjer etter 2400 personar vart arresterte førre helg, og fredelege demonstrasjonar utvikla seg til opptøyar i delar av landet, inkludert plyndring i blant anna Paris, Marseille, Lyon og Bordeaux. Fleire hundre har blitt skadde i samanstøytane, og eit rådhus frå 1800-talet vart tent på i Limoges.

Demonstrasjonane vart starta av elevar ved vidaregåande skular som ønsker betre vilkår ved skulane sine, men rørsla har vakse og utvikla seg til å også handle om offentlege tilbod og høge levekostnader.

Presidenten i landet, Emmanuel Macron, har kritisert utanlandske leiarar som har omtalt demonstrasjonane, og meiner dei har drive valkamp på Frankrike sin kostnad.

Det skal vere presidentval i Frankrike våren 2027. Det var venta at demonstrasjonane og opptøyane kom til å påverke meiningsmålingane, men førebels ser det ut som støtta til ytre høgre- og ytre venstre-kandidatane er uendra, ifølgje den siste målinga frå Politico.

300 døde i droneåtak i Sudan

300 personar skal vere drepne i to droneåtak i Sudan, ifølgje BBC. Åtaka skjedde i regionen Vest-Kurdufan, og fleire av dei drepne skal ha vore ein del av ei gravferd.

Den sudanske hæren blir skulda for åtaket.

Det har vore konflikt mellom den sudanske hæren og den paramilitære gruppa RSF sidan 2023. Krigen blir omtala som den verste humanitære krisa i verda, har drepe fleire hundretusen, og drive 14 millionar menneske på flukt.

Den siste tida har det blitt vanlegare å bruke dronar i åtaka, inkludert i område som skal vere våpenfrie soner.

Lyspunkt: Nordisk råds pris gjekk til norske vinnarar i alle kategoriar

Tysdag varsla Nordisk råd kven som hadde vunne dei forskjellige priskategoriane deira, og i år er alle norske.

Litteraturprisen går til Sigbjørn Skåden for boka Planterhaug, Láŋtdievvá på tornesamisk. Boka er også nominert til Brageprisen, og det er andre gong ein samisk forfattar vinn prisen.

Musikkprisen går til verket Elja av Kristine Tjøgersen og Benedicte Maurseth. Verket er framført av ein strykekvintett på spesialbygde hardinginstrument.