Vekas viktigaste: Stor skogbrann og Starlink-stopp

Store demonstrasjonar i Albania

Det har vore store studentdemonstrasjonar i Albania, skriv NRK. Utdanningsdepartementet og to bankar er sett i brann.

Fleire stader har det vore gatekampar mellom demonstrantar og politiet, som har nytta tåregass og vasskanonar mot demonstrantane.

«Flamingo-revolusjonen», som han blir kalla, begynte i mai i år som ein reaksjon på korrupsjon i landet, men har no utvida seg til å handle om studieforhold og billigare utdanning.

No har opptøyane eskalert, og dei siste dagane er dei valdelegaste til no.

Starlink set stoppar for ukrainske dronar

Starlink, satellitt-tenesta til Elon Musk sitt selskap SpaceX, har avgrensa kor fort noko kan reise og framleis ha internett-tilgang. Det skriv Nettavisen.

Avgrensinga betyr at alt raskare enn 160 km/t ikkje får internett. Fordi Ukraina nytter Starlink til å styre dronar, blir dei i praksis ubrukelege av avgrensinga. Endringa skal ikkje vere varsla.

Elon Musk seier det er USA sin president som har kontroll på den militære versjonen av Starlink.

Ein ukrainsk rådgjevar meiner avgrensinga skjer fordi Donald Trump vil ha stans i alle angrep på energisektoren.

Bensinprisane i USA er for tida rekordhøge før mellomvalet seinare i vinter.

«Gjerdremutvalet» vil endre oljefondet sitt etikkråd

Torsdag morgon leverte eit utval ein rapport om kva som bør vere Etikkrådet si rolle i oljefondet, skriv E24. Utvalet, leia av Svein Gjerdrem, foreslår å gi Etikkrådet mindre makt.

Då Etikkrådet blei sett på pause i fjor haust, mista dei midlertidig retten til å foreslå å utelukke selskap frå oljefondet. Den retten foreslår utvalet no at går over til Noregs Bank.

Ei anna endring, er at utvalet opnar for at Noreg kan investere i atomvåpen og militært utstyr.

Finansminister Jens Stoltenberg (Ap) har tidlegare sagt det er eit paradoks at oljefondet ikkje kan vere investert i våpenselskap som leverer våpen til Noreg.

SV, MDG og Raudt går hardt ut mot forslaget til utvalet om å opne for investeringar i våpen. Høgre meiner det er positivt med eit oljefond som ikkje er «politisert».

Lyspunkt: Bleiking av korallar kan reverserast

Forskarar ved universitetet Stanford har oppdaga at det er mogleg å reversere bleiking av korallar.

Korallar skyver ut nyttige algar om det blir for varmt i vatnet rundt dei. Denne prosessen gjer at dei blir kvite, og etter kvart døyr.

No har forskarane oppdaga at om ein set dei kvite korallane inntil ein klon av seg sjølv, smeltar dei to saman til éin frisk korall.

Prosessen tek nokre veker, og kan vere ein måte å redde korallrev som er i ferd med å døy på grunn av klimaendringane.